Májilis depýtaty Semeı qalasyna respýblıkalyq mártebe berýdi usyndy
NUR-SULTAN. QazAqparat – QR Parlamenti Májilisiniń depýtaty Azat Perýashev Semeıge respýblıkalyq qala mártebesin berý máselesin kóterdi.
Osy oraıda ol Úkimet basshysy Asqar Mamınniń atyna depýtattyq saýal joldady, dep habarlaıdy QazAqparat tilshisi.
«Búgingi kúni Abaı jeri Semeı óńirinde birqatar sharalar qolǵa alyndy. Semeı qalasy men aımaǵyn kóterýge buryn-sońdy bolmaǵan qomaqty qarajat bólinip, gúldenýine kúsh jumsalýda. Árıne, halyq ta Semeı qalasynyń ósýine, órkendeýine qýanýda. Óıtkeni Semeı qalasynyń geografııalyq orny, ekonomıkalyq deńgeıi, saıası murasy oǵan ábden laıyq», - dep toqtaldy depýtat.
A. Perýashev ótken jyly Elbasy Nursultan Nazarbaevtyń Jarlyǵymen ejelgi Túrkistan qalasy oblys ortalyǵyna aınalyp, al Shymkent shaharyna respýblıkalyq dáreje berilgenin eske saldy. Bul tarıhı sheshim Túrkistan aımaǵyn búkil túrki áleminiń ordasy retinde qaıtadan nyǵaıtýǵa jol ashty. Shymkent óz mártebesin túsirmeı, elimizdiń betke ustar qalalarynyń biri retinde ary qaraı damýda.
«Osy oraıda ker zamanda qazaqtyń rýhyn kótergen, qazaqtyń daýysyn jetkizip, ıisin tanytqan Abaı rýhynyń ordasy - Semeı qalasyna da tıisti mártebesin berý oryndy dep sanaımyz. Qurmetti Asqar Uzaqbaıuly, Ákimshilik-aýmaqtyq qurylysy týraly Zańynyń úshinshi babyna sáıkes, respýblıkalyq mańyzy bar qalalar qataryna halqynyń sany 1 mıllıon adamnan asatyn eldi mekender nemese erekshe memlekettik mańyzy bar qalalar jatady. Bizdiń oıymyzsha, Semeı qalasy dál osy erekshe memlekettik mańyzy bar qala. Sondyqtan oǵan respýblıkalyq mártebe berý jóninde Memleket basshysyna usynys engizý múmkindigin qarastyrýyńyzdy suraımyz», - dedi Azat Perýashev.
