Májilis depýtaty «Samuryq-Qazynanyń» bıýdjetke aýdaryp júrgen qarajaty tym az ekenin aıtty
«Memleket basshysy Qasym-Jomart Toqaevtyń Qazaqstan halqyna Joldaýynda Ulttyq qordyń qarjysyn tıimsiz jumsaýdy toqtatyp, qarajatty asa qajetti ınfraqurylymdy damytýǵa jáne elimiz úshin mańyzy zor jobalardy qarjylandyrýǵa jumsalý kerektigin nazarǵa saldy. Alaıda, aıtylǵan synǵa, berilgen tapsyrmaǵa biraz ýaqyt ótse de Ulttyq ál-aýqat qorynyń memleket bıýdjetine qarajat bólýi kóńil kónshitpeı otyr. Atap aıtqanda, 2022 jyly «Samuryq-Qazyna» ulttyq ál-aýqat qory memleketke beriletin paıdanyń 70 paıyzynyń ornyna tek 10 paıyzyn ǵana tólegen. Naqtyraq toqtalsaq, 1 trıllıon 629 mlrd teńge taza tabystyń 170 mlrd teńgesin qaıtaryp otyr. Al tapsyrma boıynsha, bıýdjetke 1 trıllıon 140 mlrd teńge qaıtarý qajet edi. ıAǵnı, 970 mlrd teńge memleket qazynasyna aýdarylmaǵan. Bul qarajat respýblıkalyq bıýdjetke quıylsa, eldiń ál-aýqatyn kóteretin jobalardy iske asyrýǵa baǵyttalatyn edi», - dedi M. Jaıymbetov Premer-Mınıstrdiń orynbasary Erulan Jamaýbaevtyń atyna joldaǵan saýalynda.
Onyń paıymynsha, áli de Ulttyq ál-aýqat qoryna qarasty kompanııalardyń tabystaryn ashyq túrde jarııalaý talaby saqtalmaı otyr.
«Máselen, 2022 jyly Air Astana basshysy ózine 394 mln teńge syıaqy tólegeni týraly aqparatty buqaralyq aqparat quraldarynyń ókilderi jarysa jazdy. Al, «Samuryq-Qazyna» ulttyq ál-aýqat qorynyń deńgeıimen salystyrýǵa kelmeıtin «Otbasy bank» memleketke 67 mlrd teńgeden astam qarajat qaıtardy», - dedi depýtat.
Onyń sózine qaraǵanda, dıvıdendtik saıasattaǵy júıelilik kemshilikterdi qaıta retteý qajet.
«Ulttyq ál-aýqat qory memleketke beriletin 70% paıdasyn tolyq qaıtarýdy jáne qaıtarylǵan qarajatty «Jaıly mektep» jobasyna nemese áleýmettik nysandardyń boı kóterýine jumsaýdy usynamyn. Holdıngter men Ulttyq kompanııalardyń dıvıdendtik tabystary boıynsha Parlamentke ashyq esep berýin qamtamasyz etý asa mańyzdy ekenin de atap ótkim keledi», - dedi Marhabat Jaıymbetov.
