Májilis depýtaty salyqtyq ákimshileýdegi kemshilikterdi atady
Onyń aıtýynsha, salyqtyq ákimshileý aqparattyq júıesiniń málimetter bazasyn ózektendirý jáne ıntegratsııalaýda ózekti máseleler bar. Depýtattar bul máselelerdi 2015 jyldan beri kóterip, Úkimetke ony sheshý úshin qajetti sharalar qabyldaýǵa usynys jasap keledi.
«4 jyl ótkenimen problema áli de sheshilgen joq. Qorytyndysynda salyq tóleýshiler zardap shegip otyr. 2018 jyldyń jazynda halyqqa túsindirý jumystaryn der ýaqytynda uıymdastyrmaýdyń saldarynan azamattar salyqtyq bereshekteri bar ekendigin jáne soǵan baılanysty shekteýlerdi bankke barǵanda jáne áýejaıda biraq bilgen. Buǵan qosa, bul málimetter keı jaǵdaıda durys bolmaı shyqqan. Jyljymaıtyn múlik nysandary, kólik, jer ýchaskesi boıynsha málimetterdi ýaqtyly ózektendirmeý barlyq tóleýshilerge jappaı problema men qolaısyzdyq týdyrdy. Nátıjesinde kópshiligi der ýaqytynda demalysqa shyǵa almady, bank esepshotyn asha almady, kredıt alý múmkindiginen aıyryldy. Eseptelgen salyqtardy der kezinde tólegendigin dáleldep ýaqytyn joǵaltty», - dedi depýtat.
G.Qaraǵusovanyń sózine qaraǵanda, bul problemalar áli kúnge deıin túbegeıli sheshilmegen. Sebebi eshkimge jaýapkershilik júktelmegen. Alaıda bul problemany sheshýge bıýdjetten únemi qomaqty qarjy bólinip keledi.
«Máselen, tek 2015-2018 jyldary Qarjy mınıstrliginiń 30-dan astam aqparattyq júıesiniń, onyń ishinde Memlekettik kirister komıtetiniń 20 júıesiniń qyzmetin qoldaý úshin 34,5 mlrd teńge jumsalǵan. Salyqtyq ákimshileý júıesin reformalaýǵa munan bólek 2,5 mlrd teńge bólingen. Al 2019 jylǵa dál osy maqsattarǵa sáıkesinshe 9,5 mlrd jáne 2,4 mlrd teńge qarajat qarastyrylyp otyr», - dedi ol.
Osy rette depýtat Qarjy mınıstrligi 2020 jyly barlyq salyqtyq mindettemelerdi esepteýdi ortalyqtandyrý jáne avtomattandyrý mindetin alyp otyrǵandyǵyn eske saldy.
«Osyǵan oraı ókiletti organdarǵa barlyq málimetter bazasynyń derekterin ózektendirýdi jedeldetý, salyqtyq esepteýlerdiń durystyǵyn qamtamasyz etý úshin olardyń Memlekettik kirister komıtetiniń aqparattyq júıelerimen sınhrondylyǵyn jáne ıntegratsııasyn qamtamasyz etýdi ótinemiz», - dedi G.Qaraǵusova.