Májilis depýtaty Prezıdenttiń UQShU kómegine júginý sheshimine pikir bildirdi
NUR-SULTAN. QazAqparat – QR Parlamenti Májilisiniń depýtaty Muhtar Erman Memleket basshysynyń Ujymdyq qaýipsizdik shart uıymy kómegine júginý týraly sheshimine pikir bildirdi, dep habarlaıdy QazAqparat tilshisi.
«Memleket basshysy Qasym-Jomart Kemeluly Toqaev Qazaqstannyń óńirlerinde, ásirese Almatyda bassyzdyqqa barǵan terrorlyq bandylardyń tarapynan týyndaǵan qaýip-qaterden elimizdi qorǵaý úshin barlyq is-sharalardy qabyldaýda. Jappaı qıratý, tonaý, quqyq qorǵaý kúshterimen qarýly qaqtyǵystar – munyń barlyǵy jedel jáne tabandy is-áreketti talap etedi», - dedi Muhtar Erman.
Osy rette ol elimizde terrorǵa qarsy operatsııa júrgizilip jatqanyn atap ótti.
«Memleket basshysy Qaýipsizdik keńesiniń otyrysynda UQShU-daǵy seriktesterden kómek surap júginý sheshimin túsindirgeni anyq. Qazaqstan Prezıdenti eń aldymen azamattardyń qaýipsizdigi men tynyshtyǵy múddesi úshin mundaı sheshim qabyldady. Qazirgi ýaqyttaǵy basty maqsat – tynyshtyq saqtap, azamattyq jaýapkershilik tanytý», - dedi Májilis depýtaty.
Eske salsaq, QR Prezıdenti Qasym-Jomart Toqaev Ujymdyq qaýipsizdik shart uıymyna múshe elderdiń basshylarynan terrorlyq syn-qaterdi eńserýde kómek suraǵan edi.