Májilis depýtaty: Prezıdent Joldaýy – jyldyń basty qujaty
«Memleket basshysynyń qaı sózi de mańyzdy. Ásirese jyl saıynǵy dástúrli Joldaýdyń jóni bólek. Óıtkeni Prezıdent Joldaýy – jyldyń basty qujaty. Búgin de kóptiń kóńilinen shyǵatyn, jurttyń júregine jetetin Joldaý boldy dep nyq senimmen aıta alamyn. Óıtkeni, Toqaevtyń sózinde ómirimizdiń eń bir ózekti máseleleri kórsetildi. Negizinen problemalarǵa quryldy, qoldaǵy bar tabystardy ornyqtyrýdyń jáne jańa shepterdi alýdyń qıyn mindetteri alǵa qoıyldy. Al elge tikeleı keletin jaqsylyqtardy aıtsaq, aldaǵy 5 jylda sapaly aýyz sýmen 100 paıyz qamtamasyz etý – el úshin erekshe qýanyshty jaǵdaı bolmaq. Sodan keıin eń tómengi jalaqy mólsherin 60 myń teńgege deıin ósirý de mıllıondaǵan adamdardyń turmystyq jaǵdaıyn jaqsartatyn dúnıe, sebebi barlyǵy osy kórsetkishke baılanysty ózgeredi», - dedi depýtat Parlament Májilisinde tilshilerge bergen suhbatynda.
Sonymen birge, Joldaýda áleýmettik sala qyzmetkerleri jalaqysyn 2022-2025 jyldary 20 paıyzdan asyryp otyrý kózdelgen, bul ózgeris 650 myń adamdy qamtıdy.
«Sodan keıin eldiń psıhologııasyn ózgertý, paternalıstik psıhologııadan arylý, masyldyq kóńil-kúıden arylý jóninde úlken máseleler aıtyldy. Ult zııalylarynyń mıssııasy týraly aıtyldy. Jalpy kóp oıǵa qaldyratyn, tolǵandyratyn, aldaǵy mindetterdiń kúrdeliligin halyqqa sezindiretin Joldaý boldy dep aıtamyz. Endi tek iske kirisý kerek», - dedi S. Abdrahmanov.
Aıta keteıik, búgin Qasym-Jomart Toqaev Parlamenttiń eki palatasynyń birlesken otyrysynda Qazaqstan halqyna jyl saıynǵy Joldaýyn jarııalady. Joldaýda Prezıdent elimizdiń áleýmettik-ekonomıkalyq damýynyń aldaǵy jylǵa arnalǵan basym maqsattaryn jarııa etti.
