Májilis depýtaty: Prezıdent Joldaýy halyqtyń muń-muqtajyna negizdelgen
ALMATY. QazAqparat - Búgin Almatyda QR Parlamenti Májilisiniń depýtattary Qazaqstan halqy Assambleıasynyń múshelerimen kezdesti, dep habarlaıdy QazAqparat tilshisi.
Halyq qalaýlylary Elbasynyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» Joldaýynyń basty basymdyqtaryn talqylady.
3 qańtardan beri QR Parlamenti Májilisiniń depýtattary óńirlerde saılaýshylarymen kezdesýde.
«3 qańtardan beri almatylyqtarmen kezdesýler ótkizdik. Muǵalimder, qoǵam qaıratkerleri, ata-analar komıtetiniń ókilderin zeınetaqymen qamtý, bilim berý salasyn jańǵyrtý máseleleri alańdatyp otyr. Halyq kótergen máselelerdiń barlyǵy Elbasynyń joldaýynda aıtyldy», - dedi QHA múshelerimen kezdesýde Parlament Májilisiniń depýtaty Shaımardan Nurymov.
4 qyrkúıek-29 jeltoqsan aralyǵynda Májiliste turaqty komıtetterdiń 135 otyrysy ótip, zań jobasy boıynsha 369 joba qarastyryldy.
78 zań jobasy qaraldy, olardyń 24-i aldyńǵy sessııadan qalǵan. 54 zań jobasy 3 aıda túsken.
8 zań jobasyn Májilis depýtattary usynǵan.
Osy aralyqta 22 zań jobasyna Memleket basshysy qol qoıdy.
«Elbasynyń ár Joldaýy halyqtyń muń-muqtajyn kóteredi. Máselen qıyn ekonomıkalyq ahýal jaǵdaıynda áskerı azamattardyń jaǵdaıyn jasaýǵa mıllıardtaǵan aqsha bólinip otyr. 1 qańtardan bastap áskerı qyzmetkerlerdi baspanamen qamtý týraly zań kúshine endi»,- dedi Shaımardan Nurymov.
Sonymen qatar depýtat jumys toptarynyń qyzmeti týraly da aıta ketti.
Aıta ketý kerek, keshe QR Memleket basshysy Nursultan Nazarbaev «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty kezekti Joldaýyn jarııalaǵan bolatyn.
