Májilis depýtaty Otan aldyndaǵy mindetin úzdik atqarǵan sarbazdardy grantpen oqýǵa túsirý máselesin kóterdi

«Áskerı qyzmet adamzat ǵumyrynyń erekshe jáne asa mańyzdy túri. Tarıhtyń barsha kezeńderinde bizdiń ata-babalarymyz ómirin áskerı qyzmetke arnap, qoldaryna qarý alyp, elimizdi qorǵaýǵa daıyn turǵan. Elin súıý, Otanyn qorǵaý qashanda er jigittiń paryzy», - deı kele depýtat Almas Turtaev jaýyngerlik qyzmet búgingi kúni de óz mańyzdylyǵyn joǵaltpaǵanyn atap ótti. Degenmen, depýtattyń paıymynsha, elimizde keıingi jyldary áskerı qyzmettiń shynaıy jaǵdaıy túbegeıli túrde ózgerdi. Osyǵan baılanysty, áskerı kadrlar qyzmetine yntalandyrýdy kúsheıtý qajettiligi týyndap otyr. Bul rette depýtat Ulttyq ulan, Qorǵanys mınıstrligi, Ulttyq qaýipsizdik komıtetiniń shekara qyzmeti qarýly kúshteriniń qatarynda qyzmet atqarýdyń jastar arasynda bedelin arttyrý kerektigin aıtyp, oǵan yqpal etý túrleriniń biri merzimdi áskerı qyzmettegi sarbazdardy medaldarmen jáne erekshelik belgilerimen marapattaý bolyp tabylatynyn alǵa tartady. «Otan aldyndaǵy áskerı boryshyn óteý - ol maqtanysh, joǵarǵy abyroıly ólshem bolýy tıis. Ókinishke oraı, qazir jastar arasynda keıde áskerı mindetin óteýshilerge áleýmettik kemsitýshilik nyshandary da baıqalyp, músirkeı qaraıtyndar da tabylyp jatyr. Sonymen qatar, merzimdi áskerı qyzmetti bosqa ótken ýaqytpen baılanystyrmas úshin, ony áskerı boryshty tabysty ótkizý sımvoldarymen, ıaǵnı vedomstvolyq medaldarmen jáne úzdik belgilerimen marapattaý qajet. Áskerdiń jáne áskerı qyzmettiń jaǵymdy mártebesin nasıhattaý maqsatynda, merzimdi qyzmetti óteıtinderdiń áskerden keýdesine medal men belgiler taǵyp qaıtýy, óskeleń urpaqtyń aldynda áskerı qyzmettiń bedelin arttyrýmen qatar, óz Otanyna qyzmettik boryshyn atqarǵan azamattyń ózin-ózi baǵalaýyn kúsheıtýine zor yqpal jasaıdy», - deıdi A. Turtaev. Onyń sózine qaraǵanda, qazir elimizde vedomstvolyq nagradalar tizimine sáıkes, merzimdi áskerı qyzmettegi sarbazdarǵa tek tós belgiler ǵana beriledi. Bul belgilerge ásker qataryna shaqyrylǵan tek sanaýly jastar ǵana qol jetkize alady. «Medaldarǵa kelsek, 10 jyldan 20 jylǵa deıin minsiz qyzmet atqarǵan úshin beriletin «Minsiz qyzmeti úshin» medaline merzimdi qyzmet sarbazynyń qoly múlde jetpeıdi. Qazirgi naryqtyq ekonomıka kezeńinde merzimdi áskerı qyzmette bolýdyń ózi de erlik. Sondyqtan biz sarbazdarymyzdy tós belgilerimen ǵana emes, medaldarmen marapattaǵan jón dep esepteımiz», - deıdi depýtat. Onyń sózine qaraǵanda, halyqaralyq tájirıbede mundaı normalar barshylyq. Máselen, Reseıdiń merzimdi qyzmet sarbazdaryn marapattaý júıesinde 40-tan astam vedomstvolyq medaldarmen men belgiler qarastyrylǵan. Al AQSh qarýly kúshterinde memlekettik nagradalarmen qatar, merzimdi qyzmet áskerleri óz jetistikteri úshin AQSh qorǵanys mınıstrliginiń birqatar vedomstvolyq medaldarymen marapattalady. Sosyn AQSh ondaı sarbazdardy grant arqyly tegin oqytýdy da jolǵa qoıǵan. «Jastardyń Otan aldyndaǵy azamattyq boryshy men basty Konstıtýtsııalyq mindetin oryndaýǵa degen patrıottyq sezimin oıatyp, qulshynysyn arttyrý, merzimdi áskerı qyzmettiń bedelin kóterý maqsatynda, Otan qorǵaýshy kúnine nemese áskerı qyzmettiń aıaqtalýyna baılanysty sarbazdardy marapattaýǵa arnalǵan Qorǵanys mınıstrliginiń, Ulttyq ulan, Shekara qyzmeti áskeriniń «Adal qyzmeti úshin» vedomstvolyq medalin tabystaý máselesin qarastyrsaq. Sonymen qatar, Otan aldyndaǵy mindetin úzdik atqarǵan sarbazdarǵa memlekettik granttar arqyly joǵarǵy bilim alý múmkindigi júzege assa ıgi», - dedi depýtat A. Turtaev.