Májilis depýtaty Oralda prokýratýra qyzmetkerlerimen kezdesti
ORAL. QazAqparat - Májilis depýtaty, zańnama jáne sot-quqyqtyq reforma komıtetiniń múshesi Balaıym Kesebaeva BQO-ǵa jumys sapary barysynda oblystyq prokýratýra qyzmetkerlerimen kezdesti, dep habarlaıdy «QazAqparat» HAA tilshisi.
Oblys ákiminiń orynbasary Marat Toqjanov, oblys prokýrory Saparbek Nurpeıisov qatysqan jıynda Májilis depýtaty Elbasynyń «Qazaqstannyń úshinshi jańǵyrýy: jahandyq básekege qabilettilik» atty Joldaýynyń negizgi baǵyttary men bılik tarmaqtary arasynda ókilettikterdi bólý máseleleri týraly baıandap berdi.
«Memleket basshysynyń bılik tarmaqtary arasynda ókilettikterdi qaıta bólý jónindegi bastamasy elimizdiń saıası júıesin demokratııalandyrý baǵytyn nyq ustanǵandyǵyn taǵy bir kórsetedi. Qazirgi tańdaǵy basty mindetimiz - Elbasy alǵa qoıǵan maqsat-mindetter údesinen shyǵyp, ekonomıkany nyǵaıtýmen birge Qazaqstannyń ishki-syrtqy saıasatynyń turaqtylyǵyn qamtamasyz etý», dedi Balaıym Kesebaeva.
Kezdesý barysynda prokýratýra qyzmetkerleri jazasyn ótep kelgenderdi jumysqa ornalastyrý, sot oryndaýshylary, jergilikti polıtsııa qyzmetindegi túıtkildi jaıttar, azamattardy ǵalamtor keńistigindegi qylmystyq áreketterden qorǵaý tóńireginde saýal qoıyp, jaýaptaryn aldy.
Aıta keteıik, Balaıym Kesebaeva óńirge sapary barysynda birneshe aýdanda bolyp, sondaı-aq oblys ortalyǵynda ádilet departamenti, basqa da mekeme-uıym qyzmetkerlerimen kezdesti.
