Májilis depýtaty óndiris oryndaryn aralady - Aqmola oblysy
KÓKShETAÝ. QazAqparat - Qazaqstan Respýblıkasy Parlamenti Májilisiniń depýtaty Máýlen Áshimbaev jumys saparymen Kókshetaý qalasynda boldy, dep habarlaıdy «QazAqparat» HAA tilshisi.
Sapar barysynda halyq qalaýlysy aldymen oblystaǵy irgeli kásiporyn sanalatyn «Tynys» aktsıonerlik qoǵamynda bolyp, óndiris tsehtaryn aralap kórdi. Búgingi tańda osy zaýytta shyǵarylatyn avıatsııa, temir jol, munaı salalaryna qajetti qosalqy bólshekter men qarýly kúshter qurylymdaryna arnalǵan bronejıletter tapsyrys berýshiler tarapynan jaqsy baǵa alyp, suranysqa ıe bolýda.
Zaýyt Aqmola oblysynda mashına jasaý isiniń kósh basynda tur. Qazaqstan Respýblıkasy Úkimetiniń údemeli ındýstrııalyq-ınnovatsııalyq damý baǵdarlamasynyń ónerkásipti ártaraptandyrý baǵytyn júzege asyrý maqsatynda jumys isteýde.
Zaýyttyń bas dırektory Qaırat Qalmanbaevtyń sózine qaraǵanda, búgingi tańda «Tynys» aktsıonerlik qoǵamy kóp salaly kásiporyn qatarynda. Avıatsııalyq ónimniń negizgi tutynýshylary - Reseı men Belarýstiń avıajasaý jáne avıajóndeý kásiporyndary. Kásiporynnyń ónimin satý saıasaty ishki jáne syrtqy naryqtarǵa baǵyttalǵan. Osy kúni «Qazaqstan temir joly», «Qazmunaıgaz», «Qazatomónerkásip», «Qazaqtelekom», «Qaztransoıl», «Qaztransgaz», «KEGOK» aktsıonerlik qoǵamdary sııaqty iri kompanııalarǵa ónimderin jetkizedi.
Májilis depýtaty zaýyttyń qurastyrý tsehyn aralap kórip, shyǵarylyp jatqan ónim túrlerimen tanysty.
«Sońǵy kezde kásiporyn basshylyǵy ónim óndirýde otandyq úlestiń mol bolýyna erekshe nazar aýdaryp keledi. Degenmen, áli de otandyq úlesti artyrý jáne daıyn ónimdi satý aýmaǵyn keńeıtý baǵyttynda áli de aýqymdy jumys isteý kerek. Biz óz tarapymyzdan kómektesýge daıynbyz», - dedi Májilis depýtaty Máýlen Áshimbaev.
Sonymen qatar, Májilis depýtaty «55/10» áskerı bólim men «Kókshetaý sút zaýyty» JShS jumysymen tanysty.
Al, «Nur Otan» partııasy oblystyq fılıalynda azamattardy jeke máseleleri boıynsha qabyldaǵan halyq qalaýlysyna kelgen kókshetaýlyq turǵyndar mindetti áskerı qyzmetti óteý, zeınetaqy tólemderin ósirý sııaqty másele kóterdi. 
