Májilis depýtaty muraǵat pen murajaı qyzmetkerleriniń jalaqysyn arttyrýdy usyndy
ASTANA. QazAqparat - Azamattyq qyzmetshiler arasynda muraǵattar men murajaılar qyzmetkerleri eń tómengi jalaqy alyp otyr. Búgin Parlament Májilisinde Úkimet basshysynyń atyna saýal joldaǵan depýtat Gúlnar Seıitmaǵanbetova osy sanattaǵy qyzmetkerlerdiń jalaqysyn kóterýdi usyndy.
Depýtattyń aıtýynsha, muraǵattar men murajaılar qyzmetkerleri óz jumysy barysynda densaýlyqqa keri áser etetin kóptegen faktorlarmen kezdesedi. «Aıtalyq, olar paleontologııalyq, arheologııalyq materıaldardyń radıatsııalyq sáýlelerimen, organıkalyq eksponattarda shoǵyrlanatyn mıkroaǵzalarmen, kóne metall artefaktilerdegi totyqtardyń ýly qospalarymen, tozań jáne talshyqtarmen, hımıkattarmen kúnbe-kún jumys jasap júr. Osyndaı jaǵdaılar bul sanattaǵy qyzmetkerlerge eńbekaqy tólenýi barysynda eskerilmeı júr. Rasynda, osy másele ár túrli deńgeıde qaraldy, tıisti memlekettik organdardyń da oń qorytyndysy alynǵan. Alaıda, kúni búginge deıin oi sheshimi tabylmaı otyr», - dedi G. Seıitmaǵanbetova.
Bul rette depýtat azamattyq qyzmetkerlerdiń jalaqy júıesine engiziletin jańa ózgeristerge toqtala kele, onyń barysynda murajaılar men muraǵat qyzmetkerlerine qosymsha aqy tóleý máselesin qarastyrýdy usyndy.
