Májilis depýtaty mınıstrdiń tilshilerge bergen jaýabyn synady
Depýtat aqparat beretin ári BAQ-pen ózara is-qımyldy qamtamasyz etetin laýazymdy tulǵalardyń jumysyn retteıtin tártip kókeıkesti másele ekenin atap ótti.
«Osy oraıda bir mysaldan bastaǵym keledi. Jaqynda laýazymdy sheneýnik otyrystan shyqqannan keıin, oǵan tilshiler kelip saýal qoıa bastady. Ol óz kezeginde: «18-shi ret jaýap berip otyrmyn» dep tótesinen qoıdy. Ary qaraı sózbe-sóz ne aıtylǵany esimde joq, biraq osyndaı ekpinmen jaýap qaıtarýǵa bola ma?!» - dep toqtaldy depýtat «Qazaqstan Respýblıkasynyń keıbir zańnamalyq aktilerine aqparat jáne kommýnıkatsııalar máseleleri boıynsha ózgerister men tolyqtyrýlar engizý týraly» zań jobasy boıynsha Májiliste ótken sarapshylar kezdesýinde.
Budan bólek, Mıhaıl Chırkov memlekettik organdardaǵy baspasóz qyzmetteriniń jumysyna toqtaldy.
«Kóbinese olar baspasóz habarlamasymen ǵana shekteledi. Biz ony jaqsy bilemiz. Nege bul baspasóz qyzmetteri jumys istemeıdi, nege onyń qurylymdary tıisti deńgeıde túsinik bermeıdi? Osy oraıda qalyptasqan jaǵdaı men jumys qarqynyna qatysty aqparat taratýǵa bolar edi ǵoı. Bundaı úrdis osy vedomstvoda ǵana emes, sonymen qatar basqalarynda da eskerilmegen», - dedi depýtat.
Bul rette ol vedomstvo ókilderi tıisti deńgeıde jýrnalısterge nazar aýdarmaýynan, sáıkesinshe tilshiler qaýymy laıyqty jaýapty beretinin, osydan baspasóz betterinde synaý jaǵdaılary oryn alatynyn atap ótti.
Esterińizge sala keteıik, seısenbide Úkimet otyrysynan keıin Energetıka mınıstri Qanat Bozymbaev eldegi janarmaı-jaǵarmaı jaǵdaıy boıynsha suraǵan tilshilerge jaýap bergen bolatyn.
«Qazir 18-shi ret aıtamyn: qarashanyń sońyna qaraı baǵanyń túzelýin boljap otyrmyz. Bul tek bir kúnde ǵana jasalatyn protsess emes...», - degen edi mınıstr.
