Májilis depýtaty «Kóne Taraz» mýzeıiniń múshkil halin aıtyp, Úkimetke saýal joldady
NUR-SULTAN. QazAqparat - QR Parlamenti Májilisiniń depýtaty Meırambek Tólepbergen «Kóne Taraz» mýzeıiniń jeti jylǵa jýyq ýaqyt boıy jumys istemeı turǵanyn aıtyp, Premer-Mınıstrdiń orynbasary Eraly Toǵjanovtyń atyna saýal joldady, dep habarlaıdy QazAqparat tilshisi.
«2015 jyly elimizde memlekettigimizdiń bastaýy - Qazaq handyǵynyń 550 jyldyǵyn atap óttik. Respýblıkalyq deńgeıde qolǵa alynǵan merekelik is-sharanyń sharyqtaý shegi Taraz qalasynda boldy.
Osy saltanattyń aıasynda kóne qalanyń qaq ortasynda «Kóne Taraz mýzeıiniń» ashylýy bizdiń mádenı-rýhanı ómirimizde eleýli oqıǵa bolǵany anyq.
Alaıda, ataýly jańalyqtyń jalǵasýy, ulttyq mádenı máni men onyń halyqaralyq deńgeıde týrısterdi qyzyqtyratyn jolyn ashpaı, múldem toqtap qaldy.
Sebebi, ataq-dańqy alysqa ketip, syrttaı ásemdigi kóz tartatyn sý jańa mýzeı ǵımaraty sapasyz salynǵan bolyp shyqty.
Tóbesinen sý sorǵalady, jertóle úı-jaıy jaramsyz, káriz júıesi, elektrmen jabdyqtaý, jeldetý jáne jylytý, salqyndatý júıeleri múldem jumys istemeıdi», - dedi depýtat.
Depýtattyń málimeti boıynsha, bul qurylysty salýǵa jáne sol ýaqytta mýzeılendirýge 1 mlrd. 200 mln. teńgege jýyq qarjy jumsalǵan.
«Osynshama memleket qarjysy aýaǵa ushqanmen birdeı bolady. Jergilikti atqarý organdary bas merdigerdiń jumysty sapasyz oryndaǵany úshin kelisim-shartty buzýy, odan keıin qaıta jóndeý jumystaryna júginýi eshqandaı nátıje bergen joq.
Jeti jylǵa jýyq jumys istemeı, kózge kúıik bolyp, qańqıyp turǵan bul mýzeıdiń taǵdyry qalaı bolǵanda da sheshilýi tıis», - degen Májilis ókili «AMANAT» partııasy fraktsııasynyń atynanbirneshe naqty usynys aıtty.
Olar:
1) Osy «saqaldy qurylysty» aıaqtaýdyń amalyn qarastyrý;
2) Sheshim qabyldaǵan sheneýnikterdiń jaýapkershilik deńgeıin anyqtaý;
3) Mundaı soraqylyqtyń qaıtalanbaýy úshin quqyqtyq jaǵdaı jasaý.
Májilis otyrysynan keıin spıker Erlan Qojanov Tuńǵysh Prezıdent týraly Zań qashan kúshin joıatynyn aıtty.
