Májilis depýtaty Kenesary hannyń bas súıegin Reseıden qaıtarý máselesin kóterdi

ASTANA. QazAqparat – Búgin Májilistiń jalpy otyrysynda depýtat Baqytbek Smaǵul Máskeýdegi mýzeıde Kenesary hannyń bas súıegi men myltyǵy ýaqytsha saqtaýǵa qoıylǵanyn aıtty, dep habarlaıdy QazAqparat tilshisi.

«Qazirgi ýaqytta Kenesary hannyń bas súıegi men onyń myltyǵy Máskeýde etnografııalyq mýzeıde ýaqytsha saqtaýda tur. 2021 jyly geografııalyq qoǵam uıymdastyryp, Qazaqstannan arnaıy barǵan komıssııa jáne mamandar Uly hannyń bas súıegi men myltyǵyn sáıkestendirý jumystarymen aınalysty. Tarıhı, antropologııalyq, mýzeı jáne muraǵat zertteýleri kesheniniń qorytyndysynda myltyqtyń hanǵa 100 paıyz tıesili ekeni, al Kenesary hannyń bas súıegi jónindegi sáıkestik 90%-dan joǵary ekeni aıtyldy», - dedi B. Smaǵul Úkimet basshysy Álıhan Smaıylovtyń atyna joldaǵan saýalynda.

Osy oraıda depýtat Kenesary hannyń súıegi men myltyǵyn Reseıden Qazaqstanǵa qaıtarý máselesine qoldaý kórsetýdi surady.

«Han súıegin Astanadaǵy Ulttyq panteonda jerleýdi, al myltyqty Ulttyq mýzeıge tapsyrýdy usynamyn. Bul shara el rýhynyń asqaqtaýyna, otanshyldyqtyń kúsheıýine jáne el astanasyndaǵy týrızmniń damýyna yqpal eteri sózsiz», - dedi Baqytbek Smaǵul.

Budan buryn habarlanǵandaı, 2015 jyly ǵalym Hangeldi Ábjanov Kenesarynyń bas súıegin Ombydan izdeý kerek ekenin aıtqan edi.

Sonymen qatar ǵalym Zııabek Qabuldınov Ombynyń mýzeıinde Kenesary hannyń myltyǵy saqtaýǵa qoıylǵanyn aıta kele, osy tarıhı jádigerdi elge qaıtarý máselesin kótergen edi.

Sankt-Peterbýrgte Kenesary hannyń kisesi saqtalǵany anyqtaldy.