Májilis depýtaty Qazaqstanda brendtik araqtar shyǵarý máselesin kóterdi
ASTANA. QazAqparat - Búgin Parlament Májilisiniń jalpy otyrysynda depýtat Tursynbek Ómirzaqov Qazaqstanda brendtik araqtar shyǵarý máselesin kóterdi. Toqtala ketetin jaıt, jıyn barysynda palata depýtattary alkogol ónimderin óndirý men olardyń aınalymyna qatysty zań jobasyn talqylaǵan bolatyn.
Depýtattyń aıtýynsha, keıbir statıstıka boıynsha Qazaqstan 1 mln. shólmek araqty eksporttasa, esesine 40 mln. shólmek araqty ımporttaıdy. «Bul nege solaı? Durys araq shyǵara almaǵanymyz ba? Frantsııany alyńyz, olardyń shampany - brend, Germanııada - syra, Shotlandııada - vıskı. Nege bizge ózimizdiń brendtik araqty shyǵarmasqa? Osyny shyǵaraıyq, sosyn álemdik naryqta sony sataıyq. Bundaı óndiristen biz ózimiz «buzylyp» ketpeımiz ǵoı», - dedi depýtat Tursynbek Ómirzaqov.
Depýtattyń aıtýynsha, bul - ekonomıka, qarjy úshin asa mańyzdy óndiris. «Aıta keteıik, álemdi úreılendiretin qarý-jaraqtyń túr-túrin AQSh pen Reseı shyǵaryp, sony búkil álemge satyp jatyr. Qarý-jaraq shyǵarǵan jaman ekeni bárimizge túsinikti, alaıda olar osydan bıýdjetterin toltyryp jatqan joq pa? Al bizde Kókshetaýdaǵy zaýytta eń joǵary sapaly spırt shyǵarylady. Buny álemdik deńgeıge nege kótermeımiz? Osyny kótersek, Qazaqstan kerisinshe 40 mln. shólmek araqty syrtqa eksporttap, 1 mln. ımporttaýǵa da múmkindigi bolatyn edi», - deıdi T. Ómirzaqov.
Óz kezeginde Qarjy mınıstri Baqyt Sultanov depýtat kótergen máselege jaýap bere kele, «brendtik araq shyǵarý» taqyryby qyzyq ekenin, alaıda qazirgi tańda eń birinshi kezekte alkogol aınalymyndaǵy kóleńkeli ekonomıkamen kúresti qolǵa alý kerektigin atap ótti. «Bizde alkogoldi tutyný mádenıetiniń ózi úlken másele bolyp turǵanda brend týraly sóz qozǵaýǵa áli erterek», - deıdi B. Sultanov.
