Májilis depýtaty qasiretti qańtar oqıǵasyna qatysty pikirin bildirdi

NURSULTAN. QazAqparat - Jyl basynda ómirimizge engen saıası qasiretti qańtar oqıǵasy Táýelsizdik jyldaryndaǵy aýyr syn saǵattyń biri boldy. Oǵan resmı baǵa berildi. Memlekettik tóńkeriske jasalǵan qadam dep tanyldy. Demek, bul - Táýelsizdiktiń tamyryna balta shabylǵan qadamdar. Radıkaldyq saıası toptar, naqtyraq aıtqanda, dinı toptar qara nıet, aram pıǵyldaryn júzege asyrǵysy kelgen aýyr zardapty kezeń boldy. Tipti baqylaýdan shyqqan sátti de bastan ótkerdik, - deıdi Májilis depýtaty Janarbek Áshimjanov.

Depýtattyń aıtýynsha, kúsh qurylymdyq saladaǵy qyzmetkerlerdiń ózi beıtarap qaldy. Elimizdiń qaýipsizdigine jaýapty qyzmet organdarynyń halyqtyń aldyndaǵy sharasyz kúıin kórdik.

Shaıqalyp jatqan Konstıtýtsııalyq qurylymdy toqtatýǵa, joıýǵa baǵyttalǵan Memleket basshysy Qasym-Jomart Toqaevtyń sheshimi arqasynda aýyr synaqtardan óttik. Barlyq jaýapkershilikti el Prezıdenti óz moınyna aldy. Jalpy sol kúnderdegi ahýal, qoǵamdaǵy jaǵdaı, aýyr kóńil-kúı, baqylaýdan shyqqan sátterdiń saıası baǵasy saraptalyp, quqyqtyq baǵasy beriler, biraq halyqty qalqan etken aram pıǵyldy toptardyń jaǵdaıyna halyq alańdaýly. Osy rette biz aqparattyq-nasıhattyq jumys júrgizip, halyqqa kómektesýimiz kerek. Aıta ketetinim, halyq sol kezeńderdegi Memleket basshysynyń erlik-jigerin túsine bilýi qajet. Konstıtýtsııalyq qurylym túbegeıli joıylsa, osy kúnderi qandaı jaǵdaıda bolyp, neni bastan keshetinimizdi oılap kórińiz?! – deıdi Janarbek Áshimjanov.

Májilismen qańtardaǵy aýyr jaǵdaılar boıynsha Memleket basshysynyń naqty sharalar qabyldaǵanyn ýaqyt dáleldeıtinin jetkizdi. Sonymen birge depýtat buǵan deıin qańtardaǵy oqıǵaǵa baılanysty máseleler kóterilip, birneshe ret depýtattyq saýaldar joldanǵanyn atap ótti.

Sonymen qatar áleýmettik jelilerde qańtar qasiretine qatysqan azamattardy azaptaýlar kóbeıip jatqanyn aıtyp, osy máselege qatysty depýtattyń oıyn bildik, dep atap ótedi tómengi palatanyń baspasóz qyzmeti.

Janarbek Áshimjanovtyń sózinshe, laýazymyn asyra paıdalanǵan ishki ister organdary, jalpy quzyrly organdardyń qyzmetkerlerine qatysty birneshe qylmystyq is qozǵaldy.

- Orynsyz, naqaq jala jabylyp jatqan, taıaqqa túsken birneshe iske qatysty Prezıdent naqty tapsyrma berdi. Sóıtip birneshe azamat bosatyldy. Al endi soqqyǵa jyǵylyp jatqan aýyr azaptaýlar qoǵamnyń da, eldiń de, jeke azamat retinde meniń de janyma batady. Erteń Taldyqorǵanǵa osy oqıǵaǵa baılanysty issaparǵa baryp, turǵyndarmen kezdesemin. Elimizde qylmys jasaǵany da, qylmysqa qatystylyǵy da zań sheńberinde qaralýy kerek. Al qyzmetin asyra paıdalanǵan tıisti vedomstvo ókilderine zań júzinde baǵasy berilýi tıis. Prokýratýra osyndaı máselege baılanysty birneshe qylmystyq is qozǵalǵany týraly málimet bergen bolatyn, - dedi Janarbek Áshimjanov.