Májilis depýtaty Q.Sultanov: VI shaqyrylymda Májiliste qazaq tiliniń qoldanylýy aıtarlyqtaı artty
Bul týraly Parlament Májilisiniń depýtaty Qýanysh Sultanov málim etti, dep habarlaıdy QazAqparat.
Onyń sózine qaraǵanda, qujattardy qaraý barysynda Tuńǵysh Prezıdent – Elbasy N.Á.Nazarbaevtyń, Memleket Basshysy Q.J.Toqaevtyń Qazaqstan halqyna Joldaýlary jarııalanǵan, el ómirindegi eń mańyzdy máseleler basty nazarda boldy.
Atalǵan merzimde Májiliste jıyny 487 zań jobasy qaralyp, onyń 431-i qabyldanǵan. Olardyń 390-na búginde
Memleket Basshysy qol qoıdy. Sonyń ishinde, osy shaqyrylymda Májilis alty Kodeks qabyldady. Ásirese, Densaýlyq, Ekologııa, Ákimshiliktik Kodeksterdiń qabyldanýyna búkil qoǵam qatysty deýge tolyq negiz bar. «Erekshe atap ótý kerek, osy VI shaqyrylymda depýtattar 60 Zańǵa ózderi bastamashy boldy. Bul burynǵy shaqyrylymdarmen salystyrǵanda joǵary kórsetkish. Árbir Zań ózektiligine oraı, túrli talqylaý deńgeıinen ótedi. Mysaly, bir zań jobasymen 40-tan astam jumys tobynyń otyrystary ótkizilip, depýtattar tarapynan kóptegen túzetýler engiziledi. Densaýlyq saqtaý kodeksiniń Úkimetten kelgen jobasyna Májilis depýtattary 900-ge jýyq, al, Ekologııalyq kodeks jobasyna 700-den asa túzetý engizildi»,-dedi halyq qalaýlysy.
Depýtattyń aıtýynsha, Zań jobasyna osynsha kóp túzetýdiń engizilýi birinshiden, Úkimet tarapynan kelip túsken jobanyń shıkiligin, ekinshiden depýtattardyń asa jaýaptylyǵyn kórsetedi.
Osy rette, áleýmettik sala da basty nazarda. Osyǵan oraı, kópbalaly otbasylarǵa jańa járdemaqylar belgileýge, ataýly áleýmettik kómekti arttyrýǵa múmkindik beretin, sondaı-aq, pedagogtar mártebesin kúsheıtýge, beıbit jınalystar jáne volonterlik qyzmetterdi retteýge jol ashatyn mańyzdy Zańdar qabyldandy.
«Qazir jumys toptarynyń otyrystaryna depýtattar ǵana qatyspaıdy. Osy shaqyrylymda zań jobalaryn talqylaıtyn jumys toptarynyń quramyna saıası partııalardyń ókilderi, azamattyq qoǵam belsendileri, salalyq mamandar, sarapshylar tartylyp, olardyń pikirleri eskerilip júr. Keıingi kezde Májilistiń keńeıtilgen otyrystary ǵana emes, salalyq komıtetterdiń otyrystary da jekelegen saıttarda, portaldarda onlaın túrde kórsetiledi. - deıdi Májilis depýtaty Qýanysh Sultanov.
Osy jyldarda Májiliste 61 ret «Úkimet saǵaty», 6 ret Parlamenttik tyńdaý, 70 «dóńgelek ústel», 18 konferentsııa ótkizilgen.
Elde qalyptasqan pandemııa kezinde de Májilis belsendi jumys atqaryp, ekonomıkalyq ósýdi qalpyna keltirý jáne áleýmettik jaǵdaıdy turaqtandyrýǵa yqpal etetin zańnamalyq qujattar qabyldady.
Qýanysh Sultanovtyń aıtýynsha, Májilis óz qyzmeti barysynda memlekettik til mártebesin kúsheıtýge basa kóńil bólgen. Nátıjesinde, osy bes jylda Májilistegi 550 baıandamanyń 495-i memlekettik tilde jasalypty. Bul 90 paıyzdyq kórsetkish. Al, qosymsha baıandamanyń 70 paıyzdan astamy memlekettik tilde jasaldy. Qazaq tilinde qoıylǵan suraqtardyń sany 54 paıyz boldy. Osy rette, suraǵyn memlekettik tilde qoıatyn ózge tildi áriptesterimizdiń qatary da qalyńdaı túsken.
Qýanysh Sultanov depýtattyq saýaldar týraly da basa aıtyp, Úkimetke joldanǵan 1149 saýaldyń árqaısysynda sony daıyndaǵan halyq qalaýlylarynyń máseleni baıyppen zerttep, problemany der kezinde kóterip júrgenderin jetkizdi.
Depýtattar memlekettik organdardan kelgen jaýaptarǵa qanaǵattanbaǵan jaǵdaıda máseleni naqtyraq qaraýdy talap etip, qaıtadan jaýap aldyryp jatady. Taǵy bir aıta ketetin jaǵdaı, depýtattar atyna 23 myńnan asa hat túsip, olardyń bári de tıisti oryndarǵa joldanǵan, tıisti jaýaptar alynǵan, hat ıeleri habardar etilgen.
Osy bes jylda depýtattar óńirlerge 14 ret shyǵyp, uzyn sany 17 myńnan astam kezdesý ótkizip, olarǵa 1 mıllıon 140 myń adam qatysty.
Sonymen qatar, Qýanysh Sultanov ózi múshesi sanalatyn Májilistiń halyqaralyq qyzmetine de kóńil bóle kelip, elordamyzda ótken Eýropa men Azııa elderi parlamentteri spıkerleriniń IV keńesine toqtaldy. Bul – halyqaralyq deńgeıdegi eń bedeldi forýmǵa aınalǵanyn atap ótti.
Qýanysh Sultanov Májilis qyzmeti shyn máninde, barlyq áriptesteri úshin ómir mektebi bolǵanyn alǵa tarta kelip, aldaǵy kezde de saıasattaǵy sabaqtastyq saqtalyp, otandyq parlamentarızmniń Elbasy qalyptastyryp, Memleket Basshysy jalǵastyrǵan strategııalyq baǵyttary odan ári damı túsetinine senim bildirdi.
