Májilis depýtaty K. Saǵadıev QazUÝ túlekteri kúnine oraı ýnıversıtettiń eń ozat stýdentterine 5 shákirtaqy taǵaıyndady
ALMATY. 28 mamyr. QazAqparat /Ádilet Musahaev/ - QazUÝ bizge halyqqa adal qyzmet etýdi úıretti. Ýnıversıtetten alǵan tárbıe oı-sanamyzdy bekitti.
Mansapqa, qyzmetke jetýime ashylǵan jol - QazUÝ bilimimen keldi. QR Parlamenti Májilisiniń depýtaty Kenjaǵalı Saǵadıev «QazUÝ túlekteri kúni» merekelik sharasy barysynda osylaı aıtty.
Májilis depýtaty bul mereke arqyly urpaqtar sabaqtastyǵy jalǵasatyndyǵyn aıta kele, áli kúnge deıin qyzyǵy men shyjyǵy mol stýdenttik shaq jáne ustazdar ulaǵaty esinde ekendigin aıtyp, tól ýnıversıtetine arnaıy alyp kelgen qonaqkádesimen bólisti. «Meniń ýnıversıtetke degen alǵysym sheksiz. Osy oraıda «QazUÝ túlegi kúnine» arnaıy syılyǵymdy ala keldim. Meniń atymnan on jyl qatarynan, jyl saıyn ýnıversıtettiń eń ozat stýdentterine 5 shákirtaqy usynyp otyrmyn», - deıdi depýtat Kenjeǵalı Saǵadıev.
Aǵa býyn alǵystarynan keıin bilim, sport, shyǵarmashylyq, qoǵamdyq jáne ǵylymı jumysta ózin jan-jaqty kórsete bilgen stýdentter «Ýnıversıtettiń oqý ozaty», «Stýdenttik ózin-ózi basqarýdyń kóshbasshysy», «Zertteýshi - jas ǵalym», «Úzdik kórkemónerpaz» jáne «Úzdik sportshy-túlek» dıplomdarymen marapattaldy. Ýnıversıtetti bıyl támamdaǵaly otyrǵan túlekter sóz alyp, qımaı qoshtasatyndyqtarymen bólisti.
«Qoǵamda kásibı merekeler jeterlik. Solardyń qataryna búgin taǵy bir mereke qosylyp otyr. Ol - «Ál-Farabı atyndaǵy QazUÝ túleginiń kúni». Álemdik ýnıversıtetter tájirıbesine úńiletin bolsaq, joǵary oqý oryndarynyń damýyna úlken úles qosatyn birden-bir qozǵaýshy kúsh - sol ýnıversıtettiń túlekteri eken. Bul mereke ýnıversıtet kúntizbeliginde, qara shańyraq tarıhynda altyn áriptermen belgilenetini sózsiz. Mereke ýnıversıtet túlekterine degen úlken yqylasty tanytady. Biz jaqsy dástúrdi bastap otyrmyz, alda da jalǵasyn tabady», - dep atap ótti óz sózinde QazUÝ rektory Ǵalymqaıyr Mutanuly.
Bul kúni QazUÝ qalashyǵynda ýnıversıtettiń ár jylǵy túlekteri bas qosyp, stýdenttik shaqtyń qyzyqty sátterinen syr bólisti. QazUÝ rektory Ǵalymqaıyr Mutanov bastaǵan bul toptyń qatarynda QR Parlament májilisiniń depýtaty, 1951 jylǵy QazUÝ túlegi Kenjaǵalı Saǵadıev, QR Parlament Májilisiniń depýtaty Kamal Burhanov jáne Almaty qalasynyń prokýrory Ámirhan Estaev sonymen qatar birneshe zııaly qaýym ókilderi bar.
