Májilis depýtaty iri qalalardaǵy aqyly kólik turaqtarynyń jumysyn synǵa aldy
«Qazirgi kezde elimizdiń iri qalalarynda aqyly kólik turaqtary qaptap ketti. Bastapqyda atalǵan kólik turaqtary kóshelerdegi kólik retsizdigin sheshýge baǵyttalǵanymen, túptep kelgende másele sheshilmedi, kerisinshe áleýmettik narazylyqqa negiz bolar suraqtar bar. Birinshiden, avtoturaqtardy ornalastyrý máselesine toqtalsam, is júzinde megapolısterdegi bul naryqty birneshe operator monopolııalandyryp alǵan. Olar alǵashynda adam kóp baratyn ortalyq jáne iskerlik aýdandarda aqyly turaqtardy asha bastady. Alaıda, 2021 jyly tek Astana qalasynda aqyly turaqtar sany 20 esege artqan. Aqyly avtoturaqtarǵa kommertsııalyq ortalyqtar, qoǵamdyq oryndar, sondaı-aq qurylys normalary men qaǵıdalardy buza otyryp, áleýmettik obektilerge keletinderge arnalǵan jerler berildi. Turǵyndary tıisti kondomınıým rásimdep úlgermegen turǵyn alaptary men aýdandarda da aqyly turaqtar paıda bola bastady», - dedi S. Nurtaza Úkimet basshysynyń birinshi orynbasary Roman Sklıardyń atyna joldaǵan saýalynda.
Sonymen qatar, ol bul saladaǵy shart talaptary jaıynda aıtty. Jeke seriktesterge esh qarajat jumsaýdy qajet etpeıtin, jumys istep turǵan avtoturaqtar beriledi. Jeke seriktes tólem alý qurylǵylaryn ornatady.
«Kiristiń 95 paıyzy jeke serikteske, al 5 paıyzy memleketke túsedi. Abattandyrý, joldy jóndeý jáne kósheni jınaý shyǵyndaryn qala ákimdigi kóteredi. Shart talaptaryn áleýmettik ádilettilik turǵysynan qaıta qaraý abzal. Sonymen qatar, aqyly avtoturaqtar úshin arnaıy aıyppul túri engizilgen jáne aıyppul somasy – 10 350 teńge, ıaǵnı azamattarymyz 100 teńge tólemegen jaǵdaıda, 10 myń teńge tóleýge májbúr. Bul aıyppul 100 ese kóp. Bul aıyppuldardy avtoturaq ákimshileri emes, Іshki ister mınıstrligi alyp otyrady. Ákimdik pen aqyly avtoturaq operatorlarynyń ózara osyndaı qarama-qaıshylyq qatynastary memlekettik-jekemenshik áriptestik talaptaryna saı kelmeıdi», - dedi depýtat.
Osy aıtylǵan jaǵdaıǵa qatysty aqyly avtoturaqtardy kólik eń kóp jınalatyn jerlerde ǵana qaldyryp, olardyń sanyn qaıta qarap, qysqartý usynyldy.
«Aqyly kólik turaqtaryn qadaǵalaıtyn memlekettik operatordy qurý múmkindigin qarastyrý nemese memleket pen jekemenshik sektorynyń seriktestigi týraly sharttardyń talaptaryn qaıta qarap, jekemenshik seriktesterge berilgen aýmaqtardy kútip ustaý qyzmetin júkteý ózekti. Jeke adamdar men aqyly avtoturaqtardyń jekemenshik operatory arasyndaǵy shart talaptaryn buzǵany úshin aıyppul óndirý rásimine quqyqtyq baǵa berilýin suraımyz», - dedi S. Nurtaza.
Budan buryn habarlanǵandaı, jaqynda elordadaǵy aqyly turaqtardan túsken tabystyń 25%-ǵa deıingi mólsheri ákimdikke tıesili bolmaq.
