Májilis depýtaty Irak Elekeev áriptesterine ózderin-ózderi taratýdy usyndy
ANA. 18 mamyr. QazAqparat /Qanat Mámetqazyuly/ - QR Parlamenti Májilisiniń depýtaty Irak Elekeev áriptesterin Qazaqstandaǵy sybaılas jemqorlyqpen kúresti kúsheıtýge shaqyryp, eger bul is qoldarynan kelmese ózderin-ózderi taratýdy usyndy. Ol bul usynysyn búgin, 18 mamyr kúni Májilistiń jalpy otyrysynda aıtty.
I. Elekeev óz sózinde másele bıýdjetten mıllıardtaǵan qarjynyń jymqyrylyp jatqanyna qatysty bolǵan jaǵdaıda dáp parlamentshiler «órt sóndirýshi komanda» bolýy tıistigin atap kórsetti. «Biz, másele qordalanǵan problemalarǵa jáne myńdaǵan ári mıllıondaǵan saılaýshylarymyzdyń zańdy quqyqtaryna, júıeli jemqorlyqqa jáne sheneýnikterdiń áreketsizdigine qatysty bolǵan kezde «órt sóndirýshi komanda» bolýǵa tıispiz», - dedi ol. Osy oraıda Qazaqstannyń keden júıesinde áreket etip kelgen qylmystyq toptyń aýyzdyqtalǵanyn eske salǵan depýtat, sybaılas jemqorlyqqa qatysty barlyq mańyzdy máseleler Parlament qabyrǵasynda talqylanýy tıistigin atap kórsetti. «Dál Parlamentte qoǵamdyq pikir týyndaıdy. Biz zań jobalaryn qarastyratyn jalpy otyrystarmen ǵana shektelip qalmaı, mańyzdy qoǵamdyq qarym-qatynastardy keńinen talqylaýymyz kerek», - dedi I. Elekeev.
Osy oraıda qoǵamda oryn alǵan keıbir sybaılas jemqorlyqpen baılanysty qylmystarǵa toqtalǵan depýtat, qoǵamnyń jegi qurtyna aınalǵan bundaı istermen kúreste parlamentshiler qol qýsyryp qarap otyrmaı, saılaýshylardyń quqyqtaryn qorǵaýy tıistigin, qylmystyq sındıkattar qyzmetiniń aldyn-alý úshin quqyq qorǵaý organdyryna kómektesýleri tıistigin aıtty. "Biz Memleket basshysynyń kómekshisi bolýǵa, Elbasyna jemqorlyqpen kúres boıynsha mindetterdi sheshýde kómektesýge tıispiz. Jáne árbir memlekettik organ sóz júzinde emes, is júzinde jemqorlyqpen kúreste naqty jumysty júrgizýi tıis", - dedi ol.
«Eger de buǵan qabiletsiz bolsaq, onda qánekı, taraıyq», - dedi I. Elekeev.
