Májilis depýtaty ІІM basshysyna kóktemgi tasqyn qaýpin eskertti
ASTANA. QazAqparat - Parlament Májilisiniń jalpy otyrysynda depýtat Berik Dúısenbınov elimizdegi kóptegen aýyldardy qalyń qar basyp qalǵanyn, kóktemde bul eldi mekenderdi sý basý qaýpi bar ekenin eskertti, dep habarlaıdy QazAqparat.
Bul turǵyda ol QR Іshki ister mınıstri Qalmuhanbet Qasymovqa tıisti depýtattyq saýaldy joldady.
«Adamdar ómirine qaýip tóndireten saryshunaq aıazdy kúnderdi ótkerýdemiz. Osy kúnderi áleýmettik jelilerde aıazǵa baılanysty túrli vıdeo túsirilimdermen tolyp ketti», - dep toqtaldy depýtat.
Onyń sózine qaraǵanda, qys bastalǵaly qutqarýshylar jergilikti atqarýshy organdarmen, jol qyzmetterimen ózara is-qımyl arqyly qar qursaýynan 5,5 myń adamdy shyǵardy, onyń ishinde 439-y - balalar. Osy oraıda kóp jerlerde adamdardy jylytýǵa arnalǵan beketter ashylǵan.
«El aýmaǵyndaǵy aıaz jáne borannan bólek, qalyń túsken qar da qosymsha synaq bolyp otyr. Jyl basynan beri tek Astananyń ózinde syrtqa shyǵarylǵan qardyń kólemi 1 mln tekshe metrden asyp tústi. Bul Qazaqstannyń iri qalasynyń biri ári osy sharalarǵa shahardaǵy qarjylandyrý kólemi de, oǵan jumyldyrylǵan tehnıka men jumysshylar da jetkilikti. Oǵan qaraǵanda, soltústik, shyǵys jáne ortalyq óńirlerdegi kóptegen aýyldyq eldi mekenderde túsken qardyń mólsheri aıtarlyqtaı kóp. Osyǵan baılanysty qaharly qystan keıin qardyń erıtin ýaqyty keletinin eske salǵym keledi. Atap aıtqanda, qarly óńirlerge kóktem kelgende sý tasqyny qaýpi týyndaıtyny anyq», - dedi Berik Dúısenbınov.
Osy oraıda ol qutqarý qyzmetteriniń qazirgi kezde qoly bos bolmasa da, degenmen de saqtandyrý sharalaryn josparlaý men daıyndyq qadamdaryna nazar aýdarýǵa shaqyrdy.
«Bul jumystar qar erigenge deıin erterek bastalǵany durys ekenin túsiný kerek», - dedi B. Dúısenbınov QR Іshki ister mınıstrine joldaǵan saýalynda.
