Májilis depýtaty halyq jumyssyzdyǵyn qalaı sheshýge bolatynyn aıtty

ASTANA. QazAqparat – Májilis depýtaty, Áleýmettik-mádenı damý komıtetiniń tóraǵasy Jámılá Nurmanbetova halyqty jumyspen qamtý boıynsha óz usynymdaryn aıtty, dep habarlaıdy QazAqparat tilshisi.

«Kedeılik deńgeıin tómendetýde halyqty jumyspen qamtý máseleleri mańyzdy ról atqarady. Mysaly, Áleýmettik kodeks normalary bul baǵytta qolda bar tetikter arsenalyn qaıtalaıdy. 2007-2008 jyldardaǵy daǵdarys kezeńinde jumyssyz azamattardy ýaqytsha jumyspen qamtý boıynsha ınfraqurylymdyq jobalardy iske asyrý túrinde ázirlengen tetik 15 jyl boıy qoldanylyp keledi. Mıllıondaǵan qarajat kásipkerlik negizderin úıretýge baǵyttalǵan», - dedi Jámılá Nurmanbetova Áleýmettik kodeks jobasy týraly Úkimet saǵatynda.

Onyń aıtýynsha, jumyssyzdyqtyń 4,9% turaqty deńgeıine qaramastan, Qazaqstan eńbek naryǵynda «ózin-ózi jumyspen qamtyǵandar», jasyryn jumyssyzdyqtyń bolýy jáne «kóleńkeli jumyspen qamtý» problemalary bar.

«Jumyssyzdar sanyn anyqtaýdyń naqty ádistemesiniń bolmaýy halyqtyń memlekettik organdarǵa senimsizdigin týdyrady. Jumyspen qamtý salasy turmys deńgeıi men adam áleýetiniń sapasyn arttyrýǵa baǵyttalǵan reformalar qajet dep sanaımyz. Bul rette ákimder sheshýshi róldi alyp, al mınıstrlik – strategııalyq jahandyq protsesterge ilesýi tıis», - deıdi depýtat.

Ol úshin ákimderdiń jumysy qazirgideı ýaqytsha emes, sapaly jumys oryndaryn qurýǵa baǵyttalýy kerek.

«Sondaı-aq biz kásibin jańa bastaǵan bıznesmender men startaptar úshin arnaýly marketpleıster qajet dep sanaımyz. Búkil álemde onlaın satý naryǵy qarqyndy damyp keledi. Internet saıttarynda túrli mindetterdi oryndaýǵa baılanysty quzyretterdi bolashaqtyń mamandyqtary dep ataýǵa bolady. Sondyqtan kadrlardy daıarlaýda jańa mamandyqtarǵa erekshe nazar aýdarýymyz kerek. Mysaly kórshi el Qytaı kedeılik pen jumyssyzdyq máselelerin sheshý úshin eldiń eń jaqsy kásipkerlerin iske tarta aldy. Jáne olar osy baǵytta keremet progreske jetti. Biz de álemdegi eń jaqsy tájirıbelerdi jınap, jumysta qoldanýymyz kerek», - dedi J. Nurmanbetova.

Buǵan deıin depýtat Áleýmettik kodekste eskirgen jáne negizsiz áleýmettik parametrler qoldanylatynyn, mınıstrlikke eń tómengi kúnkóris deńgeıin esepteý ádistemesin jetildirý qajettigin aıtqan edi.