Májilis depýtaty fýtbol legıonerlerinen bas tartýdy usyndy
ASTANA. QazAqparat - QR Parlamenti Májilisiniń depýtaty Ahmed Mýradov Premer-Mınıstrdiń atyna jol joldaǵan resmı saýalynda legıoner fýtbolshylardan bas tartýdy usyndy, dep habarlaıdy QazAqparat tilshisi.
«Dene tárbıesi jáne sport salasyndaǵy ókiletti organdar jyl saıyn legıonerler sanyn qysqartý saıasatyn júrgizip keledi. Degenmen, olardyń sanynyń azaıatyn túri joq. Máselen, Shymkenttiń fýtbol klýbtarynda - 11, Almatyda - 10, Astanada - 9, Aqtóbe, Almaty, Atyraý, Batys Qazaqstan, Qaraǵandy, Qostanaı, Qyzylorda, Pavlodar, Soltústik Qazaqstan oblystarynda 8-den legıoner bar», - dedi Ahmed Mýradov.
Májilis depýtatynyń derekterine qaraǵanda, Qazaqstanda fýtbolmen aınalysatyn 600-den astam adam bar. 46 fýtbol klýby jumys istese, onyń 12-si joǵary lıgada, 12-si birinshi lıgada jáne 21-i ekinshi lıganyń qatarynda. Atalǵan klýbtardy qarjylandyrý jergilikti bıýdjet esebinen júzege asyrylady. Bul rette, qarjylandyrý kólemi Sport jáne dene shynyqtyrý isteri komıteti málimetterinen is júzinde birshama tómen bolyp otyr. Buǵan qosa, kóptegen klýbtardyń sportshylar aldyndaǵy qaryzy da jetkilikti.
Onyń atap ótýinshe, dene tárbıesi jáne sport salasyndaǵy ókiletti organdar jyl saıyn legıonerler sanyn qysqartý saıasatyn turaqty negizde júrgizip keledi. Alaıda legıoner fýtbolshylardyń sany azaımaı otyr.
«Joǵaryda aıtylǵandardy eskere kele bıýdjet qarajaty negizinen legıonerler men sheteldik mamandarǵa shyǵyndalady dep qorytyndy jasaýǵa bolady», - dedi Májilis depýtaty.
Osyǵan oraı Ahmed Mýradov fýtbolǵa sheteldik legıonerlerdi ákelý tájirıbesinen bas tartýdy, otandyq kadrlardy daıyndaý úshin ǵana bilikti mamandar shaqyrýdy, sondaı-aq fýtbol komandalary shyǵystarynyń biryńǵaı normatıvin bekitýdi usyndy.
