Májilis depýtaty Erlan Saıyrov Túrkııadaǵy saılaýdyń qalaı ótip jatqanyn aıtty

ASTANA. QazAqparat – Májilis depýtaty Erlan Saıyrov Túrkııadaǵy saılaýǵa baıqaýshy bolyp bardy. Agenttik tilshisimen suhbattasqan depýtat bul eldegi prezıdent jáne parlament saılaýy qalaı ótip jatqanyn aıtty, dep habarlaıdy QazAqparat tilshisi.

«Búgin tańǵy saǵat 8-den bastap, Túrkııa astanasyndaǵy bes saılaý ýchaskesin aralap shyqtyq. Jalpy jaǵdaı óte turaqty, daýys berýge kelgen adam qarasy óte kóp. Keıbiri daýys bergen soń, shaıhanalarda bas qosyp, pikirtalas jasaýda. Bul Túrkııa halqynyń saıası belsendi ekenin kórsetedi. Saılaý jergilikti ýaqytpen 17:00-de aıaqtalady», - dedi E. Saıyrov QazAqparat tilshisine bergen suhbatynda.

Onyń aıtýynsha, Túrkııada 85 mln halyq bar, sonyń ishinde 64 mln halyq daýys berýge quqyly, qalǵany – balalar.

«Bul rette Túrkııa zańy boıynsha, Prezıdent bolyp saılaný úshin 50,1 paıyz daýys jınaý kerek. Saılaý óte tartysty ótip jatyr. Sarapshylar da, EQYU ókilderi de kimniń jeńiske jetetini belgisiz dep aıtýda. Tipti saılaý 28 mamyrǵa – ekinshi kezeńge qalýy yqtımal», - deıdi depýtat.

Aıta keteıik, Túrkııada 28-shi shaqyrylymdaǵy parlament jáne prezıdent saılaýy ótip jatyr. Saılaý ýchaskeleri tańǵy 8:00-de ashylyp, jergilikti ýaqyt boıynsha 17:00-de jabylady. Elde barlyǵy 191 885 daýys berý jáshigi ornatyldy.