Májilis depýtaty erkin satylyp jatqan «shóptik mıksterdiń» halyq densaýlyǵyna keri áseri bolýyn eskertti
ASTANA. Qazannyń 29-y. QazAqparat - QR Parlamenti Májilisiniń depýtaty Berik Bekjanov Bas Prokýror Qaırat Mámı men Densaýlyq saqtaý mınıstri Jaqsylyq Dosqalıevke depýtattyq saýal joldap, halyqtyń densaýlyǵyna zııan tıgizetin ónimderdiń satylýyna tyıym salý qajettigin aıtty,
dep habarlaıdy QazAqparat.
«Búginde elimizde halyq densaýlyǵyna keri áserin tıgizetin «shóptik mıkster» satylýda. Erkin satylyp jatqan ósimdik qospalary nemese túsinikti tilmen aıtsaq, shóptik "mıksterdiń" áseri anashamen birdeı. Quramynda esirtki qataryna jatatyn zattar bolǵandyqtan, jýyrda ǵana Reseı shóptik "mıksterdi" satýǵa tyıym salǵan bolatyn. Sebebi shóptik qospalardyń quramynda tabylǵan zattar marıhýana men anashanyń negizgi quramdas bóligi bolyp tabylady.
Endi Gollandııada óndiriletin bul qospa soltústiktegi kórshimizdi aınalyp ótip, Qazaqstanǵa tasymaldanýda. Ázirge shóptik "mıksterge" bizdiń elde tyıym salynbaǵan.
Bir qaraǵanda qarapaıym shóptik dáriler ispettes kórinetin qospalar, ony qoldanǵan adamdy alty saǵat boıynsha esinen aıyrady eken. Bul degeniń kádimgi qatty áser etýshi psıhotroptyq zattardyń kúshinen kem emes degen sóz. Marıhýana men anashanyń quramynda psıhatroptyq zattar bolǵandyqtan adam oǵan tez táýeldi bolyp qalady. Dál sol sııaqty «shóptik mıksterge de» adam psıhologııalyq táýeldilikte bolady eken.
Bul «shóptik qospalardyń» keri áserin túsingen kóptegen Eýropa elderi bul qospany paıdalanýǵa tyıym salǵan.
Jalpy, munda ósimdik qospalarynyń túr-túri bar. Jastar arasynda tanymal "mıkster" - Spaıs pen Djın atalady eken. Baǵasy 2,5 myń teńgeden bastalady. Bular da erkin satylýda. Kerek deseńiz, bul «shóptik mıksterdi» satýshylardyń ózindik saıty bar. Onda ony satýshylar barlyq áreketteri zańdy ekenin jazǵanymen, ony alýshylarǵa satý men ony júzege asyrý óte jasyryn, qupııa negizde júrgiziledi eken», dedi depýtat Berik Bekjanov.
Depýtat saýaly joldanyp otyrǵan laýazym ıelerinen atalǵan «shóptik qospanyń» narkotıkalyq preparat ekeni resmı dáleldenbegendikten, shuǵyl túrde osy zattyń qospasyna ǵylymı zertteý júrgizip, resmı qorytyndy berýin suraıdy.
Eger onyń quramynda adam densaýlyǵyna zııandy qospa bolsa, keń qoldanylýdyń alyn alý maqsatynda, onyń adam densaýlyǵyna áserin anyqtap, «shóptik qospanyń» ózin tyıym salynǵan dárilik zattardyń tizimine engizý qajettigin atap ótti.
