Májilis depýtaty elordada áıgili kúıshi Dına Nurpeıisovanyń eskertkishin ornatýdy usyndy
TANA. 9 qarasha. QazAqparat /Aıdar Ospanalıev/ - Májilis depýtaty Gúlnár Seıitmaǵambetova elordada áıgili kúıshi Dına Nurpeıisovanyń eskertkishin ornatýdy usyndy. Bul týraly depýtat búgin Parlament Májilisiniń jalpy otyrysynda Úkimet basshysy Kárim Másimovke joldaǵan saýalynda aıtty.
Depýtattyń aıtýynsha, bıyl qazaqtyń halyq kompozıtory, ataqty kúıshi Dına Nurpeıisovanyń týǵanyna 150 jyl tolyp otyr. Osyǵan qaraı Qazaqstannyń birqatar aımaqtarynda, onyń ishinde kúıshiniń týǵan jerinde Batys Qazaqstan oblysynda elimizdiń astanasynda jáne taǵy da basqa aımaqtarynda kúıshiniń mereıtoıy kóptegen mádenı is-sharalar arqyly atap ótildi.
«Ónegeli ómir jolynda 13 balany dúnıege ákelip, abzal ana bolǵan, Dına anamyzdy da, onyń kúılerin de qazaq qoǵamy joǵary baǵalaıdy. Kúıshiniń asyl muralary urpaqtan-urpaqqa jalǵasyp, búgingi Táýelsiz qazaqstannyń halqy da Dınanyń kúılerin maqtan etedi. Osyǵan baılanysty bıylǵydaı mereıtoı tusynda kúı anasy Dına Nurpeıisovaǵa elordadan sáýletti eskertkish ornatý jóninde usynystar aıtyldy. Osy usynystarǵa baılanysty eskertkishtiń ornatylýyna qolǵabys etýińizdi suraımyn», - dedi depýtat.
