Májilis depýtaty elimizdiń ońtústik óńirindegi maqta óndirisi salasynda týyndap otyrǵan máselelerdi kóterdi
ASTANA. Maýsymnyń 9-y. QazAqparat - Búgin QR Parlamenti Májilisiniń jalpy otyrysynda depýtat Óstemir Bektóreev QR Premer-Mınıstri Kárim Másimovke saýal joldap, elimizdiń ońtústik óńirindegi maqta óndirisi máselesin kóterdi,
dep habarlaıdy QazAqparat.
Ońtústik Qazaqstan oblysy, Maqtaaral aýdanyndaǵy 300 myńnan astam halyqtyń áleýmettik-ekonomıkalyq jaǵdaıy maqta sharýashylyǵyna tikeleı baılanysty. Halyq maqta ósirýge ábden mamandanǵan. Óıtkeni maqta uzaq saqtaýǵa tózimdi. Aýdanda maqtany alǵashqy óńdeýden ótkizýge zaýytttar da jetkilikti. Keńes ókimeti kezinde maqta óniminiń 70-75 paıyzy mashınamen teriletin, qalǵan 25-30 paıyz maqta jumysshylardyń, oqýshylardyń, stýdentterdiń, qaladan kelgen járdemshilerdiń kómegimen jınalyp alynatyn.
Depýtattyń aıtýynsha, qazirgi kezde maqta teretin mashınalardyń tozyǵy jetken, tipti joq deýge bolady. 95 paıyz maqta qolmen teriledi. Aldyńǵy jyldardaǵydaı syrtan keletin jumys kúshi de joq. Óıtkeni shekara jabylǵan.
Árbir otbasy jyl on eki aı etken eńbeginiń nátıjesin jınap alýǵa barlyq otbasy múshelerin jumyldyrady. Іs júzinde qyrkúıek, qazan aılarynda oqýshylar mektepke barmaıdy. Mektep basshylaryn, atqarýshy bılik ókilderin ata-analar tyńdamaıdy. Óıtkeni ósirgen maqtany satyp kún kórý kerek. Sol sebepten Májilis depýtatyna hat joldaǵan Maqtaaral aýdandyq máslıhat depýtattary osy máseleniń kúrmeýin sheship berýge yqpal etýin suraǵan.
Depýtat birneshe usynystaryn jetkizdi. Atap aıtqanda, aýdanda birneshe MTS-ter quryp, «Djon-Dır» maqta teretin mashınalarmen jáne qajetti aýyl sharýashylyq tehnıkalarmen qamtamasyz etý. Sondaı-aq maqtaly aýdandardyń oqýshylaryna jazǵy demalysty shildeniń 1-inen qazannyń 1-ine deıin berýdi, joǵary synyp oqýshylaryn qazan aıynda oqý-óndiristik tájirıbe aılyǵyna paıdalaný kerektigin aıtty.
«Sonymen qatar maqtanyń egis kólemin 30-40 paıyzǵa deıin azaıtyp, qalǵan jerlerge kókónis túrlerin, baý-baqsha, júgeri, alma, júzim, jemis-jıdekter, mal azyǵyn egip, aýyl sharýashylyǵyn óndirýshilerdi tehnıkalarmen, tońazytqysh qoımalarmen, óńdeıtin tsehtarmen qamtamasyz etý kerek. Sonda ǵana halyqtyń turmys tirshiligi jaqsarady, jumyspen qamtamasyz etý máselesi sheshiledi»,- dedi depýtat Óstemir Bektóreev.
