Májilis depýtaty BQO-da «SunkarSmartSity» jobasynyń jumysyn qadaǵalady
ORAL. QazAqparat - Búgin Májilis depýtaty Sáken Qanybekov jumys saparymen Batys Qazaqstan oblysynyń Báıterek aýdanynda bardy, dep habarlaıdy QazAqparat Májilistiń baspasóz qyzmetine silteme jasap.
Depýtat aýdandaǵy atqarylyp jatyrǵan jumystarmen tanysyp, turǵyndarmen kezdesip, birqatar óndiris nysandaryn aralady.
«Bizdiń basty maqsatymyz – elimizdiń óńirlerin aralap, halyqtyń jaı-kúıimen tanysý. Barlyq jaǵynan qarapaıym aýyl azamattarynyń áleýetin arttyrý, ár sala boıynsha qoldaý kórsetý. Óńir ekonomıkasy men aýyl sharýashylyǵy, ınnovatsııa t.b. salalary boıynsha jumys barysyn qadaǵalaý», - dedi Sáken Qanybekov.
Sondaı-aq, Májilis depýtaty aýdandyq polıtsııa bóliminde bolyp, «SunkarSmartSity» jobasynyń jumysyn qadaǵalady. Joba jetekshisi Aleksandr Molchanovtyń aıtýynsha, qosylǵanyna az ýaqyt bolǵan beınebaqylaý kameralarynyń arqasynda toǵyz qylmys ashyldy. Oryn alǵan qylmystardyń qatarynda zorlyq-zombylyq, urlyq qylmysy t.b. bar. Osylardyń ishinde eń kóp oryn alǵany – bógde bireýdiń zatyn jymqyrý.
Sapar barysynda depýtat zem.kz saıtymen jáne Báıterek aýdany boıynsha jeke turǵyn úı qurylysy barysymen tanysty.
«Zem.kz saıtynan bos jatqan jerler, kezekte turǵandar men jer ýchaskelerin alǵan adamdar, aýktsıonǵa qatysýshylar týraly aqparattar berilgen. Eger bir adam qurylys júrgizbek bolsa, osy kórsetilgen saıtqa kirip, jerdi tańdap, sol boıynsha lottyń alǵashqy jarnasyn tólep, ETsQ alyp tirkeledi. Sodan soń tapsyrys bere alady. Biz tapsyrysty ǵalamtor arqyly qarap, barlyǵy talapqa saı bolsa, aýktsıonǵa qatysýǵa ruqsat beremiz. Búgingi tańda úı salý úshin segiz myńnan astam adam jer kezeginde tur. Turǵyn úı salý úshin Peremetnyı, Beles jáne Volodarka aýyldarynan jer berilýde. Endi kúzde jer telimi Darııan aýylynan beriletin bolady», - dedi aýdandyq Jer qatynastary bóliminiń zańgeri Nurjan Eshmuratov.
Óz kezeginde depýtat aýdanda atqarylyp jatqan ıgi isterge oń baǵasyn berip, aımaqtaǵy ózekti máselelerdi nazarǵa aldy.
