Májilis depýtaty: Bıylǵy astyqty der kezinde syrtqy naryqqa tasymaldaý kerek
ASTANA. QazAqparat - Parlament Májilisiniń jalpy otyrysynda depýtat Jeksenbaı Dúısebaev astyq tasymaldaıtyn vagondar máselesin kóterdi, dep habarlaıdy QazAqparat.
«Bıylǵy egin orý naýqanynyń nátıjesi aıtarlyqtaı tabysty bolǵany barshamyzǵa málim. Aýyl sharýashylyǵy mınıstrliginiń resmı málimetterine sáıkes, astyqtyń jalpy jıyntyǵy 21 mıllıonnan astam tonnany qurady. Osynyń úshten eki bóligi halyqaralyq standarttarǵa saı keletin joǵary sapaly ónim. Endigi másele jınap-tergen ónimdi iske jaratý, ıaǵnı ýaqtyly ishki jáne syrtqy naryqqa tasymaldaýda. Degenmen, jyl saıyn astyqty syrtqy jáne ishki naryqqa shyǵarǵanda keleńsiz jaǵdaılar oryn alyp jatady. Atap aıtqanda, astyqty tıeıtin júk vagondarynyń jetispeýshiligi baıqalady. Osyǵan baılanysty naryqqa shyǵarylatyn ónimniń basym bóligi qoımalarda jatyp qalady. Osyndaı jaǵdaı bıyl da qaıtalanyp otyr»,- dep atap ótti depýtat QR Premer-Mınıstriniń birinshi orynbasary Asqar Mamınge joldaǵan saýalynda.
Onyń sózine qaraǵanda, astyqty ólke sanalatyn Soltústik Qazaqstan oblysynda bir kúnde ǵana 654 vagon astyq kem tıelgen. Tasymal vagondardyń jetispeýshiligi qostanaılyq un óndirýshilerdi de tyǵyryqqa tirep otyr. Sońǵy eki aıda nebári 979 júk vagony tıelgen. Bul qajetti kólemniń 26 paıyzyn ǵana quraıdy.
«Qazan aıynyń sońǵy kúnderi astyqtyń ýaqtyly jetkizilmeýine baılanysty Ońtústik Qazaqstandaǵy iri un óndirýshi kásiporyndar jumysy toqtap qalýǵa az qaldy. Aımaqtaǵy eń iri astyq óndirýshi «Altyn dán» kásipornynyń toqtaýsyz jumys isteýi úshin táýligine 15 vagon shıkizat qajet eken. Al osy kólemdegi shıkizatty qamtamasyz etetin vagondar jetispeıdi. Qazirgi ýaqytta, astyq vagondarynyń sany 9700-di quraıdy. Osy vagondardyń basym bóliginiń tozyǵy jetken. Sonyń ústine, boljam boıynsha shamamen 7 myńnan astam júk vagondary jetispeıdi. Onyń ishine arnaıy maıly daqyldar, azyq-túlik ónimderin tasymaldaıtyn vagondar da kiredi. Osyndaı jaǵdaılarǵa qaramastan ózimizdegi bar júk vagondarynyń ózin basqa elge jalǵa berilýi anyqtalǵan. Joǵarydaǵy aıtylǵan máseleler boıynsha bir top áriptesterim Úkimetke tıisti hat ta joldaǵan bolatyn», - deıdi Jeksenbaı Dúısebaev.
Bul turǵyda depýtat astyqty ýaqytyly eksporttaý jáne el ishinde tasymaldaý úshin arnaıy vagondardy kóbeıtý máselesin sheshý úshin kerekti sharalardy júzege asyrýdy surady.
