Májilis depýtaty birqatar jańa mamandyq ashýdy usyndy
«Óńirlerge barǵan saparymyzda kóp salaly kásiptik tehnıkalyq kolledj ujymdarymen kezdesýde birqatar kedergilerdi baıqadyq. Mamandar daıarlaýdaǵy metodıkanyń óte eski formatta bolýy, zamanaýı mamandyqtardyń joqtyǵy, kolledjder men joǵary oqý oryndary arasynda sabaqtastyq bolmaýy, jumysshy mamandyqtardyń kommertsııalyq baǵytta daıyndalmaýy - úlken kedergi. Oqý oryndarynda kásiptik baǵdarlaý, eńbek naryǵyn zertteý syndy sharalar júrgizilmeıdi. Sondyqtan, túlekterdiń basym bóliginiń dıplomdary shań basyp qalady. Kez-kelgen mamandyq syrtqy ortamen, naryqpen tyǵyz baılanysta bolýy kerek. Mysaly avtoslesar maman daıarlaıtyn kolledj bazasynda TJO joqtyǵy, eger TJO bolmasa, olar kimdi, qalaı daıyndap jatyr degen suraq týyndaıdy. Makaron ónimderiniń tehnology mamandaryn daıarlaıtyn kolledjderdiń bazasynda eshqandaı óndiristiń bolmaýy sapasyz mamandar qalyptastyrady», - dedi depýtat.
Osyǵan oraı ol birneshe usynys jasady.
«Mamandyqqa baǵyttaý boıynsha 7-shi synyptan bastap oqýshylarǵa mamandyq tańdaýǵa jaǵdaı jasaý, mamandyqqa baılanysty pándik basymdylyqty arttyrý, eńbek sabaqtary mazmunyn arttyrý úshin eńbek olımpıadalaryn ótkizý kerek. Olardyń kolledj, JOO-men ózara sabaqtastyq ornatýy mańyzdy. Jańa júıege sáıkes, aldymen ár oblys aýmaǵyndaǵy sharýashylyqtarǵa, bıznes-qurylymdarǵa qandaı mamandardyń qajet ekeni zerttelý kerek. Suranysqa saı oqytý júıesinde teorııalyq bilimge 20, tájirıbelikke 80 paıyz kóńil bóliný kerek. Kolledj mamandyqtaryn ıntegratsııalaý qajet. Kolledj bazasyna kásipkerlerdi tartý, olarǵa óndiris bazalaryn qalyptastyrýǵa jol ashý, kolledjderge kásippen, óndirispen aınalysýǵa, ıaǵnı óz deńgeıinde naryqqa shyǵýǵa múmkindik berý kerek. Jańa mamandyqtardy ashý, máselen, búgingi kúnniń suranysyna saı orman sharýashylyǵy, týrızm, omarta isi jáne basqa da mamandyqtaryn engizý qajet», - dedi M.Tájmaǵambetova.
