Májilis depýtaty Beıneýdegi shekarashylar jataqhanasyn balabaqsha etip qaıta jasaqtaý týraly másele kóterdi
ASTANA. Qańtardyń 13-i. QazAqparat - QR Parlamenti Májilisiniń depýtaty Zeınolla Alshymbaevqa Beıneý aýdandyq jáne Mańǵystaý oblystyq máslıhatynyń 14 depýtaty qol qoıǵan hat kelip tústi.
Onda Beıneýdegi Shekara baqylaý otrıady, ıaǵnı №2095 áskerı bólimi ýaqytsha ornalasqan eki qabatty ǵımaratty balabaqsha etip qaıta jaraqtaý týraly másele kóterilgen. Bul málimetti búgin Palatanyń jalpy otyrysynda depýtat Zeınolla Alshymbaev aıtty. Ol QR Premer-Mınıstri Kárim Másimovke depýtattyq saýal joldady, dep habarlaıdy QazAqparat.
Z.Alshymbev óz saýalynda jergilikti depýtattar shekarashylardy jaqynda №2087 áskerı bólimi bosatqan ǵımaratqa kóshirý týraly usynys berip otyrǵanyn jetkizdi.
«Beıneý selosyndaǵy shekarashylar ornalasqan eki qabatty jataqhana ǵımaratyn balabaqsha etip qaıta jasaqtaý týraly Beıneý aýdanynyń ákimshiligi sheshim de qabyldaǵan. Jalpy, shekarashylardy Beıneý selosynan shekaraǵa jaqyn Tájen beketine kóshirý týraly másele Úkimet deńgeıinde kópten kóterilip keledi. Bul máselemen Úkimettiń tıisti qurylymdary aınalysýda ekeninen habarlymyz»,- deı kelip, depýtat Úkimet basshysyna: «Memleket basshysy Nursultan Nazarbaevtyń balabaqshalar úshin múmkinshilikter qarastyrýdy tapsyrǵany belgili. Sondyqtan máslıhat depýtattarynyń atalǵan ǵımaratty balabaqshaǵa laıyqtap qaıta jaraqtaý týraly usynysynyń sheshilý múmkindikterin qarastyrýyńyzdy suraımyn»,- dedi.
