Májilis depýtaty bastapqy medıtsınalyq-sanıtarlyq kómek jumysyn synady
ASTANA. QazAqparat - Bastapqy medıtsınalyq-sanıtarlyq kómek jumysy nashar júrgizilýde. Búgin QR Parlamenti palatalarynyń birlesken otyrysynda Májilis depýtaty Gúlnar Ihsanova osylaı málim etti, dep habarlaıdy QazAqparat.
«Kórsetkishterdiń ózara baılanysy men sabaqtastyǵynyń joqtyǵy baıqalady. Máselen, onkologııalyq aýrýlardyń elektrondy tizimine tirkelgen onkologııalyq aýrýlar sany kórsetkishiniń artyǵymen oryndalýy ádette obyrǵa qarsy is-sharalardyń tıimdiligi retinde túsindiriledi. Bul rette 43 myń adam boıynsha skrıngterdiń úsh kórsetkishi oryndalmaǵan. Eki myńnan astam adam skrınıngten ótýden múldem bas tartqan. Bul bastapqy medıtsınalyq-sanıtarlyq kómek jumysynyń álsiz júrgiziletindigine dálel bola alady», - dedi Májilis depýtaty.
Osy oraıda Ihsanova «Nur Otan» partııasynyń saılaýaldy naýqanynyń basty basymdyǵy retinde halyqqa bastapqy densaýlyq saqtaý qyzmetterin damytý bolǵanyn eske salyp ótti.
«Buǵan qosa, qaterli aýrýlardyń skrınıng barysynda anyqtalýy nebári 5,6 protsentti, al aldyn ala tekserý barysynda 11 protsentti, al ózderi kelip tekserilgen kezde 83 protsentti qurap otyr. Demek, aldyn ala tekserý júrgizilmeı sonyń saldarynan obyr asqynǵannan keıin biraq anyqtalady», - dedi Ihsanova.
