Májilis depýtaty Baqytbek Smaǵul shalǵaıdaǵy shekara zastavalaryna bardy
TALDYQORǴAN. QazAqparat - QR Parlamenti Májilisiniń depýtaty Baqytbek Smaǵul Almaty oblysyndaǵy shekara zastavalaryna bardy. Halyq qalaýlysy shekarashylardyń tynys-tirshiligimen tanysty, dep habarlaıdy QazAqparat tilshisi.
Májilistegi jazǵy demalysty tıimdi paıdalanǵan depýtat eń aldymen Jalańashkól zastavasyna bardy. Eldiń shetinde, jeldiń ótinde Otan aldyndaǵy boryshyn abyroımen atqaryp jatqan ofıtserler jáne sarbazdardyń jaǵdaıyn baǵdarlap, jaraqtanýymen tanysty. Halyq qalaýlysy shekarashylardyń materıaldyq-tehnıkalyq bazasynyń qanaǵattanarlyqtaı, al shekarashylardyń jaǵdaıy jaqsy ekendigin kórdi.
Bıyl 18 tamyzda Qazaqstan Respýblıkasy Ulttyq qaýipsizdik komıteti Shekara qyzmetiniń qurylǵanyna 27 jyl tolady. Sondaı-aq Jalańashkól oqıǵasyna 50 jyl. Osy bir qos aıtýly dataǵa oraı jetisýlyq shekarashylar óz zastavalary arasynda atty sherý uıymdastyrdy. Tulpar minip, tý ustaǵan sarbazdar taý-taspen, orman-toǵaı arasymen 200 shaqyrymǵa jýyq júrip ótti. «Bul sherý olardyń óz qyzmettesterine kórsetken qurmet jáne jarty ǵasyr buryn bolǵan Jalańashkól oqıǵasynda qaza tapqan sarbazdar rýhyna taǵzym etý»,- deıdi «Dostyq» shekara komendatýrasy basshysynyń orynbasary Samat Salaýatov.
Atty sherýdiń estafetasyn Jalańashkól zastavasynda Májilis depýtaty Baqytbek Smaǵul qabyldap, aq batasyn berip, Maqanshy shekara zastavasyna joldady. Sondaı-aq halyq qalaýlysy Dostyq aýylyndaǵy Jońǵar shekara zastavasyna da baryp, sarbazdardyń jaǵdaıyn surastyrdy. Óz shyǵarmalarynan jalyndy óleńder oqyp, kúrdeli jóndeýden ótken zastava aýlasyna shyrsha otyrǵyzdy.
