Májilis depýtaty Azat Sembınovtiń ókilettigi merziminen buryn toqtatyldy
NUR-SULTAN. QazAqparat – Búgin Parlament Májilisiniń jalpy otyrysynda depýtat Azat Sembınovtiń ókilettigi merziminen buryn toqtatyldy, dep habarlaıdy QazAqparat tilshisi.
QR Ortalyq saılaý komıssııasynyń múshesi Asylbek Smaǵulovtyń aıtýynsha, Májilis depýtaty Azat Sembınov mindetterin atqarýdan óz erkimen bosatý týraly ótinish bergen.
«Osyǵan oraı QR Ortalyq saılaý komıssııasy sizderdiń nazarlaryńyzǵa zańnamaǵa sáıkes, Parlament Májilisiniń depýtaty Azat Sembınovtiń ótinish berýine baılanysty onyń ókilettigin merziminen buryn toqtatý týraly máseleni sheshý úshin usynym engizip otyr», - dedi A. Smaǵulov.
Palata depýtattary bul usynymǵa qoldaý bildirdi.
Jalpy otyrysta A. Sembınovke Májilis atynan «Alǵys hat» tabystaldy.
Aıta keteıik, Azat Talǵatuly 2021 jyldyń 15 qańtarynan Qazaqstan Respýblıkasynyń Parlamenti Májilisiniń depýtaty. 2019 jyldyń «Qazaqstannyń 100 jańa esimi» konkýrsynyń jeńimpazy.
Foto: parlam.kz
