Májilis depýtaty aýyl sharýashylyǵyndaǵy eńbek ónimdiligin arttyrý joldaryn aıtty

Elimizdiń aýyl sharýashylyǵyndaǵy eńbek ónimdiligi damyǵan memleketterden 3 ese tómen bolyp otyrǵandyǵyn aıtqan depýtat ony sheshý joldary jaıynda da sóz qozǵady.

«Birinshiden, Elbasy bizdiń shyǵaryp jatqan aýyl sharýashylyǵy ónimderimizdi tereń óńdeý máselesin Úkimet aldyna qoıdy. Óıtkeni, qazirgi ýaqytta bizdiń aýyl sharýashylyǵy ónimderimizdiń 70-80 paıyzy óńdeýsiz satylýda. Tereń óńdeý qosymsha qun beredi, qosymsha paıda ákeledi. Sol arqyly eksportqa shyǵaryp, eńbek ónimdiligin arttyrýǵa bolady. Ekinshiden, byltyr aýyldyq kopperatsııalar týraly zań qabyldandy. Ony júzege asyrýdy Memleket basshysy tikeleı Úkimetke tapsyrdy. Aýyl ákimderine shaǵyn sharýashylyqtardy irilendirýdi tapsyryp, munyń aýyl sharýashylyǵy ónimderin kóptep shyǵarýǵa septigin tıgizetindigin aıtty», - dedi ol.

Sonymen qatar, depýtat fermerlerdiń ónimderin satyp alýmen aınalysatyn servıstik kooperatsııalar qurý qajettigin atap ótti. Onyń aıtýynsha, mundaı uıymdar sharýalardan deldalsyz ónimdi satyp alady ári onyń sapasy da joǵary bolady. Al munyń óndirýshilerge de, tutynýshylarǵa da paıdaly ekendigi sózsiz.

J.Dúısebaevtyń málimetinshe, kezinde elimizdegi sýarmaly jerdiń kólemi 2 mıllıon gektardan assa, búginde onyń 1 mıllıonnan astamy ǵana kádege jaraýda. Sondyqtan QR Prezıdenti aldaǵy 5 jyldyń ishinde 600 myń gektar sýarmaly jerdi aınalymǵa engizýdi tapsyrdy.

«Bul úlken mindet. Ony júzege asyrý úshin aldymen sýmen qamtyp, apatty jaǵdaıdaǵy bógetterdi qalpyna keltirý qajet. Sý jınaıtyn jańa bógetter salý kerek. Bul da bir úlken másele. Sonda ǵana bizdiń aýyl sharýashylyǵymyzdyń eksporttyq áleýeti ósedi. Qazirgi ýaqytta ókinishke oraı ІJÓ-niń 5 paıyzǵa astamyn ǵana aýyl sharýashylyǵy ónimderi qamtıdy. Joǵaryda atalǵan sharalardy qolǵa alyp, iske asyratyn bolsaq bul kórsetkishti 20-25 paıyzǵa jetkizýge bolady», - dedi depýtat.