Májilis depýtaty aýyl mektebiniń apatty jaǵdaıda turǵany jóninde másele kóterdi

dep habarlaıdy QazAqparat.

Memleket basshysy Nursultan Nazarbaev bıylǵy Joldaýynda bilim berý salasyn jańa zaman talaptaryna saı damytý jóninde arnaıy aıtyp ótti. Órkenıetke bastaǵan Qazaqstannyń bilimi men ǵylymy halyqaralyq standarttarǵa sáıkes bolýy tıis. Bizdiń urpaq sapaly bilim, sanaly tárbıe alýy úshin barlyq jaǵdaı jasalýy kerek. Sońǵy jyldary elimizdiń barlyq óńirinde, aýyldar men qalalarda bilim berý salasynyń nysandary buryn bolmaǵan qarqynmen salynyp jatyr. Degenmen, kóp jyldar boıy jóndeý kórmegen mektepter de bar.

Depýtattyń mınıstrge saýal joldaýyna Aqmola oblysynyń Partızanka men Ortaqshyl aýyldarynyń turǵyndary joldaǵan hattar sebepker bolǵan. Hat jazýshylar Partızanka aýylynda jańa mektep ǵımaratyn salýǵa yqpal etý jóninde ótinish bildirgen. Óıtkeni qazirgi mektep apatty jaǵdaıda tur.

1963 jyly segiz jyldyq bolyp ashylǵan mektep eki jyldan soń orta bilim berý ordasyna aýystyrylǵan. Osy 50 jylǵa jýyq ýaqyttyń ishinde birde-bir ret kúrdeli jóndeý jumysy júrgizilmegen, jylý júıesi de jańartylmaǵan.

Mektep salý máselesin turǵyndar kópten beri kóterip keledi. 90-ynshy jyldary bastalǵan qurylys toqtap qalǵan. 2007 jyly mekteptiń apatty jaǵdaıy týraly Aqmola oblysy, Bulandy aýdandyq ákimshiligi apparatynyń tótenshe jaǵdaılar jónindegi bas mamanynyń saraptamasy bar.

Osyndaı qıyndyqtarǵa qaramastan, mektep túlekteriniń ishinde «Altyn belgi» ıegerleri, aýdandyq olımpıada júldegerleri bolǵan. Biryńǵaı ulttyq testileýdiń qorytyndysynda mektep bitirýshilerdiń nátıjesi aýdan boıynsha 2-3 oryndardy ıelenip keledi.

«Joǵaryda aıtylǵandardy eskere otyryp, úsh jyldyq respýblıkalyq bıýdjettiń ishine 2011 jylǵa kózdelgen «100 mektep, 100 aýrýhana» memlekettik baǵdarlamasy sheńberinde Partızanka aýylynda jańa mekteptiń ǵımaratyn salý úshin qarjy bólý múmkindigin qarastyrýyńyzdy suraımyn»,- dedi depýtat B.Smaılov.