Májilis depýtaty aýyl balalaryn tegin úıirmelermen qamtý máselesin kóterdi
NUR-SULTAN. QazAqparat – Májilis depýtaty Amanjol Áltaı tegin úıirmeler men sporttyq sektsııalardy aýyl balalaryna qoljetimdi etý mehanızmderin oılastyrýdy usyndy, dep habarlaıdy QazAqparat tilshisi.
«Balalardy mádenıet jáne sport baǵytyndaǵy qosymsha bilimmen, sport jáne shyǵarmashylyq úıirmelermen qamtý úshin 5,8 mlrd qarajat qarastyrylǵan. 1523 mektepten tys qosymsha bilim berý uıymynda 1,1 mln bala úıirmelerge qatysady. Jalpy 2022 jyly qosymsha bilim berýmen qamtylǵan balalar 2 461 775 balany quraıdy. Onyń 43,68%-y nemese 1 502 951 bala qalada turady. Qalǵan 26,7 %-y nemese 958 824 bala aýylda», - dedi ol QR Premer-Mınıstriniń orynbasary Eraly Toǵjanovtyń atyna joldaǵan saýalynda.
Depýtattyń málimeti boıynsha, buqaralyq aqparat quraldarynda, áleýmettik jelilerde balalar úshin qarastyrylyp jatqan osy qarajattardyń ıgerilýi jaıynda keraǵar aqparattar bar.
«Maqsatty qarastyrylǵan qarajattyń jumsalýyna senimsizdik bildirgen ata-analar da kóptep kezdesedi. Sonymen qatar memlekettik tapsyrysty alyp otyrǵan zańdy tulǵalardyń kópshiligi sol memlekettik tapsyrysty ornalastyrýshy organnyń qyzmetkerleriniń týysqandary, tanystary ekenin de jıi aıtady. Oqýshylardy formaldi túrde tirkep qoıyp, memlekettik tapsyrysty talan-tarajǵa salýǵa jol berilmeýi tıis», - degen depýtat ózi ataǵan olqylyqtardy joıýǵa baǵyttalǵan birneshe usynys aıtty.
Olar:
1. QR Mádenıet jáne sport mınıstrligi men Bilim jáne ǵylym mınıstrligi qosymsha bilimge bólingen qarajattyń tıimdiligin baǵalaý jáne esep berý krıterııleri anyqtaýy kerek;
2. QR Bilim jáne ǵylym mınıstrligine qarasty NOBD Ulttyq bilim berýdiń málimetter bazasyndaǵy málimetteri men artsport.edu.kz platformasynyń málimetterin birizdendirý;
3. Memlekettik tapsyrysty alyp otyrǵan zańdy tulǵalarǵa qoıylatyn talaptardy kúsheıtý;
4. Qosymsha bilim berýge ornalastyrylǵan memlekettik bilim berý tapsyrysyn baqylaý, monıtorıng júrgizý tetikteri bekitý;
5. Qosymsha bilim berýdiń bir baǵyty retinde tarıhı, mádenı murany, ulttyq qundylyqtardy nasıhattaıtyn, otansúıgishtik, patrıottyq sezimderdi damytatyn úıirmeler jumysyn jolǵa qoıý;
6. Memlekettik tapsyrysty alyp otyrǵan zańdy tulǵalardyń balalarǵa usynatyn baǵdarlamalardy saraptamadan ótkizip, avtorlyq quqyq negizinde halyqqa qoljetimdi bolýyn qamtamasyz etý;
7. Qosymsha bilim alý men tegin úıirmelerdi, sporttyq sektsııalardy aýyl balalaryna qoljetimdi etý mehanızmderin oılastyrý.
Aıta keteıik, Májilis Konstıtýtsııaǵa engiziletin ózgeristerdi qamtıtyn zań jobasyn qaraı bastady.
