Májilis depýtaty atyraýlyq múmkindigi shekteýli anaǵa baspana satyp aldy

ATYRAÝ. QazAqparat – Atyraý oblysynan saılanǵan Parlament Májilisiniń depýtaty Ádil Jubanov múmkindigi shekteýli anaǵa turǵyn úı satyp alyp berdi, dep habarlaıdy QazAqparat tilshisi.

Atyraýda turatyn І top múgedegi Aıgúl Qýanyshqalıeva 15 jyl buryn múgedek arbasyna tańylǵan. Turǵyn úı alý kezeginde 2014 jyldan beri tur.

Osy kezge deıin eski turǵyn úıdiń ekinshi qabatynan páter jaldap kelgen. Otbasynda kúıeýi, bala-kelini, qyzy men úsh nemeresi bar.

«Saılaýaldy úgit-nasıhat naýqany kezinde turǵyndar tarapynan kóptegen ótinish pen usynys túsken bolatyn. Barlyǵyn da nazardan tys qaldyrmaı, qolymnan kelgen kómekti kórsetip kelemin. Sondaı ótinishtiń biri qala turǵyny Aıgúl Qýanyshqalıevadan túsken edi. Endi mine, Oraza aıt meıramynda Aıgúldiń ótinishin oryndaý múmkindigi týdy», - deıdi Ádil Jubanov.

Májilis depýtaty ózinen kómek suraǵan múmkindigi shekteýli anaǵa Atyraý qalasynan jeke turǵyn úı satyp alyp berdi. 2014 jyly salynǵan jeke baspananyń jalpy aýmaǵy – 150 sharshy metr. Oǵan jóndeý júrgizilgen.

Turǵyn úı sý, tabıǵı gaz sekildi kommýnaldyq qyzmetter jelisine qosylyp, turmystyq buıymdarmen jabdyqtalǵan. 10 sotyq jer telimi, aýlasynda jazdyq úıi bar.

«Men І toptaǵy múgedekpin. Joldasym ǵana jumys isteıdi. Bala-kelinim maǵan kómektesý úshin jumysqa shyǵa almaı otyr. Jyl saıyn ákimderge úı surap baramyn», - deıdi Aıgúl Qýanyshqalıeva.

Eske sala ketelik, budan buryn atyraýlyq azamat Almatyǵa jedel járdem kóligin syıǵa tartqany habarlanǵan edi.