Májilis depýtaty Atyraýdaǵy perınataldyq ortalyqta ota jasady
ATYRAÝ. QazAqparat - Atyraýǵa jumys saparymen kelgen QR Parlamenti Májilisiniń depýtaty, «Altyn skalpel» belgisiniń ıegeri Záýresh Amanjolova oblystyq perınataldyq ortalyqta ota jasady, dep habarlady QazAqparat tilshisi.
Kesir tiligi arqyly eki sábıdiń dúnıege kelýine septigin tıgizgen depýtat munaıly aımaqtaǵy perzenthanalardyń materıaldyq-tehnıkalyq jabdyqtalýy men dárigerlerdiń biliktigi joǵary ekenin aıtty.
«Ota jasaýǵa oblys dárigerleriniń biliktiligin baqylaý úshin emes, olardan ózime qajetti aqparattar alý úshin qatystym. Búginde Qazaqstanda ana men bala densaýlyǵyn saqtaý úshin barlyq jaǵdaı jasalǵan», - dedi ol.
Aıta keteıik, ótken jyly oblystyq perınataldyq ortalyqta 8600 bala dúnıege kelgen. Al bıylǵy jańa jyldyń alǵashqy úsh kúninde 56 náreste ómir esigin ashty.
