Májilis depýtaty áskerı qyzmetshilermen kezdesti

NUR-SULTAN. QazAqparat – Májilis depýtattarynyń aımaqtarǵa sapary barysynda Qazaqstan halqy Assambleıasynan Májilis depýtaty Natalıa Dementeva Mańǵystaý oblysynyń turǵyndarymen kezdesti, dep habarlaıdy QazAqparat QR Parlamenti Májilisiniń baspasóz qyzmetine silteme jasap.

Májilistiń Halyqaralyq ister, qorǵanys jáne qaýipsizdik komıtetiniń múshesi «sarbazdar analary» shtabynyń ókilderimen birlesip, oblysta ornalasqan Ulttyq ulannyń áskerı bólimderine, teńiz jaıaý áskerleri men áýe shabýylyna qarsy qorǵanys brıgadalaryna bardy.

Kezdesýge qatysýshylar áskerı qyzmetshilerdiń kazarmalardaǵy tynys-tirshiligimen, tamaqtaný, sondaı-aq áskerı bólimderdiń materıaldyq-tehnıkalyq jaǵdaıymen tanysty.

Áńgime barysynda Natalıa Dementeva el basshylyǵy jaýyngerlik qabiletti armııany qalyptastyrý, áskerı qyzmettiń bedelin arttyrý jáne Qarýly Kúshterdi materıaldyq jabdyqtaý máselelerine erekshe nazar aýdaratynyn atap ótti. Sońǵy ýaqytta Parlament áskerı qyzmetshiler men olardyń otbasy músheleriniń qorǵanys qabiletin arttyrýǵa jáne áleýmettik jaǵdaıyn jaqsartýǵa baǵyttalǵan birqatar mańyzdy zańnamalyq aktilerdi qabyldady.

Sonymen qatar, sapar barysynda Májilis depýtaty, Qazaqstan halqy Assambleıasy tóraǵasynyń orynbasary Natalıa Dementeva óńirdegi etnomádenı birlestikterdiń ókilderimen jáne QHA qurylymdarymen kezdesti.

Etnomádenı birlestikterdiń belsendi ókilderine Natalıa Dementeva referendýmdy daıyndaý men ótkizýge, sondaı-aq Qazaqstandaǵy dostyq pen etnosaralyq birlikti nyǵaıtýǵa belsendi qatysqany úshin alǵys hattar tabys etti.