Májilis depýtaty áskerge jaramsyzdardy qurylys batalondaryna jiberýdi usyndy
ASTANA. QazAqparat - QR Parlamenti Májilisiniń depýtaty Baqytjan Ertaev QR Tótenshe jaǵdaılar jáne Qorǵanys mınıstrlikterine ınjenerlik-qurylys batalondaryn qurý qajettiligi jóninde Úkimetke usynys joldaǵanyn jetkizdi, dep jazady nurtotan.kz.
Depýtattyń pikirinshe, mundaı bólimshelerge QR Qarýly kúshter qataryna densaýlyǵynyń nasharlyǵy nemese biliminiń sáıkes bolmaýy saldarynan ene almaǵan áskerge shaqyrylǵan azamattardy baǵyttaýǵa bolady. «Áskerge shaqyrylǵan azamat ınjenerlik-qurylys batalondarynyń qatarynan tabylǵannan keıin áskerı ant qabyldaıdy, al bul degenińiz áskerı tártipke baǵyný degendik. Ony mamandyǵy, kim bolǵysy keletindigine baılanysty aǵash ustasy, júrgizýshi, sylaqshy bolyp bóledi. Oqýdan keıin mamandyǵy boıynsha sertıfıkat alady», - deıdi Baqytjan Ertaev.
Sonymen qatar depýtat óz sózinde mundaı batalondardy Tótenshe jaǵdaılar mınıstrligi aıasynda uıymdastyrýǵa bolatyndyǵyn atady.
«Basymyzǵa túspesin árıne, biraq jer silkinisi bolǵan jaǵdaıda ınjenerlik-qurylys batalon sarbazdary TJM-ge kómek berer edi», - dedi depýtat. Buǵan qosa, Baqytjan Ertaev áskerı qyzmetkerler otbasynyń áleýmettik jaǵdaıyn jaqsartý úshin birqatar jeńildikter engizý qajettigine toqtaldy.
«Áskerı qyzmetkerler - bul jumystaǵy qaýip-qater deńgeıi joǵary topqa jatady. Óıtkeni, olar áskerı ant qabyldaı otyryp, memleketti qorǵaý jaýapkershiligin alady. Demek, áskerı qyzmetkerlerdiń otbasyna qoldaý kórsetýdiń mańyzdylyǵy orasan. Sebebi, olar da áskerı qyzmettiń aýyrtpalyqtaryn kóterip júr» - dep túıdi Baqytjan Ertaev.
