Májilis depýtaty asa aýyr júk kólikterine baqylaýdy kúsheıtýdi usyndy
NUR-SULTAN. QazAqparat - Parlament Májilisiniń jalpy otyrysynda astyq tasymaldaý kezinde júk kólikteriniń salmaǵyn qadaǵalaý máselesi kóterildi. Osy oraıda QR Úkimet basshysynyń orynbasary Jeńis Qasymbektiń atyna depýtattyq saýal joldandy, dep habarlaıdy QazAqparat tilshisi.
«Elbasy «Nur Otan» partııasynyń HVIII sezinde qazirgi zamanǵy jergilikti joldar jelisin keńeıtý Úkimettiń negizgi mindeti ekendigin atap kórsetip, 2025 jylǵa qaraı oblystyq jáne aýdandyq mańyzdaǵy joldardyń 95 protsentiniń jaı-kúıin jaqsartý maqsatynda qosymsha 350 mıllıard teńge bólýdi tapsyrǵany málim. Osynshama qarjy kútkendegideı tıimdilikti berýi úshin jergilikti joldar jelisin keńeıtýmen qatar, olardyń saqtalýyn qamtamasyz etýge aıryqsha nazar aýdarý qajet. Óıtkeni, bul másele qazirgi tańda, ásirese, elimizdiń astyqty óńirlerinde eleýli problemaǵa aınalyp otyr. Biz shalǵaıda ornalasqan aýdandarda bolǵanymyzda aýyl turǵandary osydan birer jyl buryn ǵana kúrdeli jóndeýden ótkizilgen aýdanishilik avtomobıl joldaryn kúzde astyq tasyǵan aýyrsalmaqty kólikter qaıtadan búldirip tastaǵandyǵyn aıtyp, shaǵymdandy. 70 tonnalyq qytaılyq ózi aýdarǵysh kólikter astyq tasyǵan joldar ábden janshylyp, jeńil kólikter júre almaıtyn jaǵdaıǵa ushyraǵandyǵyn óz kózimizben kórdik. Bul jergilikti joldardy qalpyna keltirýge bólingen bıýdjet qarjysy tekke jelge ushyp jatyr degen sóz», - dedi depýtat Káribaı Musyrman.
Onyń paıymynsha, avtojoldardy aýyr salmaqty kólikterdiń búldirýine jol bermeýge tıisti óńirlik kólik baqylaý ınspektsııalary ózderine júktelgen mindetti tolyq atqaryp otyr deý qıyn. Sebebi olardyń qyzmetkerleriniń sany az jáne materıaldyq-tehnıkalyq jabdyqtalýy jetkiliksiz. Mysal úshin, eginshilikpen aınalysatyn Soltústik Qazaqstan oblysynyń kólik baqylaý ınspektsııasyndaǵy 6 qyzmetker 13 aýyldyq aýdannyń joldaryndaǵy kólik aǵynyn qadaǵalap úlgere alar emes. Munda jalǵyz-aq jyljymaly kóliktik baqylaý beketi bar. Al ulan-ǵaıyr egin alqabyna ıe Qostanaı oblysynda nebári 2 jyljymaly beket jumys isteıdi. Astyqty Aqmola oblysynda da olardyń sany - 4-eý ǵana.
«Qazir óńirlerdegi kólik baqylaý ınspektsııalary oblystyq ákimdiktermen jáne ishki ister departamentterimen birlesip, aýyr júk tasymaldaýshylardy baqylaý boıynsha «Jol kartasyn» ázirlep, ony iske asyra bastady. Soǵan sáıkes jol-patrýldik polıtsııasynyń qyzmetkerleri qoldanystaǵy zańnamany buzǵan ózi aýdarǵysh aýyr salmaqty kólikterdi toqtatyp, tıisti ákimshilik jaýaptylyq týraly hattama toltyrý úshin kólik baqylaý ınspektsııasynyń ókilderin oqıǵa ornyna shaqyrady. Alaıda, olar kólik baqylaý ınspektsııasynyń qyzmetkerleri oqıǵa ornyna kelip jetkenshe, keıde uzaq ýaqyt kútýge májbúr», - dedi K. Musyrman.
Osy oraıda depýtat birneshe usynystaryn atap ótti.
Birinshiden, elimizdiń negizgi astyqty óńirleriniń erekshelikterin eskere otyryp, olardyń kólik baqylaý ınspektsııalary qyzmetkerleriniń jáne jyljymaly kólik baqylaý beketteriniń sanyn kóbeıtý máselesin qarastyrý qajet. Ekinshiden, avtomobıl joldaryn saqtaýdy jaqsartý maqsatynda kólik baqylaý ınspektsııasymen qatar, jol-patrýldik polıtsııasyna da el aýmaǵynda avtokólik quraldarynyń ruqsat etilgen salmaqtyq ólshemderdi saqtaýyn baqylaýdy júzege asyrý fýnktsııasyn berý máselesin qarastyrǵan jón.
