Májilis depýtaty Almaty oblysyndaǵy aýyl turǵyndaryn qabyldady

TALDYQORǴAN. QazAqparat - Májilis depýtaty, «Nur Otan» partııa janyndaǵy Sybaılas jemqorlyqqa qarsy is-qımyl jónindegi qoǵamdyq keńes tóraǵasy Omarhan Óksikbaev Almaty oblysynyń Eskeldi aýylynda azamattardy qabyldady, dep habarlaıdy QazAqparat Májilistiń baspasóz qyzmetine silteme jasap.

Qabyldaýǵa kelgen azamattar depýtattan turǵyn úı qujattaryn retteý, turaqty jumyspen qamtý jáne basqa da kóptegen turǵyndardy tolǵandyrǵan máselelerdi kóterdi.

«Partııalyqtar kez kelgen ýaqytta turǵyndardyń tilegine erekshe nazar aýdaryp, shuǵyl suranystarǵa jyldam jaýap berýge ázir bolýy tıis. Qazir biz tsıfrlyq zamanda ómir súremiz. Suranystar, ótinishter onlaın tirkeledi. Qoǵamdyq qabyldaý bólmeleriniń de jumysyn barynsha ońtaılandyryp, azamattardyń ótinishterin shuǵyl sheshýge kúsh salsaq jumysyz jemisti bolady. Aldyma kelgen azamattardyń ár suraǵyna den qoıyp, qolymda bar múmkindikti aıanbastan usyndym», - dedi Omarhan Nurtaıuly.

Jalpy Eskeldi aýdandyq fılıalynyń qabyldaý bólmesine jyl basynan 177 ótinish kelip tússe, olardyń 60-y oń sheshimin tapqan. 4 myńnan astam partııa múshesi, 13 bastaýysh partııa uıymy bar. Partııalyq baqylaý qyzmeti men jemqorlyqqa qarsy is-qımyl jónindegi aýdandyq keńes jyl basynan onnan astam otyrys ótkizip, memlekettik mekemelerge 17 usynys bergen.

Májilis depýtaty odan ári Jetisý óńiriniń Tekeli, Taldyqorǵan qalalary men Kerbulaq, Balqash aýdandarynyń jurtshylyǵymen kezdesýdi josparlap otyr.