Májilis depýtaty «Air Astana» ushaqtaryn avtobýsqa teńedi

ALMATY. QazAqparat - QR Parlamenti Májilisiniń depýtaty Irına Smırnova «Eır Astana» ushaǵynyń bógelýine qatysty narazylyq bildirdi. Depýtat Feısbýktegi paraqshasynda «Air Astana» áýe kompanııasynyń reısi 2,5 saǵatqa bógelgenin jazǵan.  

«Air Astana. Servıs múlde syn kótermeıdi. Taǵy da reısti keri jyljytyp jatyr. 6.10-nan 6.55-ke qaldy. Áýejaıǵa kelgende ushý ýaqyty 8.00-ge aýysqanyn bildik. Reıstiń bógelýi, keıinge qaldyrylýy «Eır Astana» úshin qalypty jaǵdaıǵa aınalyp keledi», - dep jazdy halyq qalaýlysy.

Ol sál keıinirek jeli qoldanýshylarynyń pikirine jazǵan jaýabynda áýejaı keshigýdiń sebebin túsindirip, naqty qaı ýaqytta ushyp shyǵatynyn aldyn ala málimdese degen oıyn bildirgen.

«Taǵy keshiktirildi. Endi 8.40-qa. «Eır Astana» qyzmet kórsetý sapasy boıynsha reıstik avtobýsqa uqsap barady», - deıdi ol.

Depýtattyń jazbasyna «Air Astana» AQ áleýmettik jeli boıynsha menedjeri Janna Badaýbaeva jaýap bergen.

«Reıs tehnıkalyq sebepterge baılanysty bógelgen. Keltirilgen yńǵaısyzdyqtar úshin keshirim suraımyn. Avıalaınerde tehnıkalyq jumystar júrgizildi. Reıstiń bógelýi barlyq áýe kompanııalarynda bolatyn jaǵdaı. Birinshi orynǵa biz jolaýshylardyń qaýipsizdigin qoıamyz. Qaýipsizdik úshin reısti keıinge qaldyrýǵa týra keledi. «Eır Astana» kompanııasynyń ýaqytpen jumysy álemdik kompanııalardyń deńgeıinde. Sizdiń hatyńyz kompanııanyń shaǵymmen jumys bólimine beriletin bolady», - dedi Janna Badaýbaeva.

Aıta ketý kerek, depýtat munyń aldynda da «Eır Astana» kompanııasynyń jumysyn synǵa alǵan bolatyn.

foto:portbilet.spb.ru