Májilis depýtattarynyń zań jobasyna engizgen tolyqtyrýy Úkimet tarapynan qoldaý tapty

Parlamentshiler «Halyqtyń kóshi-qony týraly» zań jobasyn qaraý barysynda kóptegen túzetýler engizdi.

Naqty aıtar bolsaq, depýtattar Bekbolat Tileýhan, Nurlan Ónerbaı, Aldan Smaıyl, Ýálıhan Qalıjanov jáne Nurtaı Sabılıanovtyń oralmandar men olardyń otbasylarynyń ózderin oralmandar kvotasyna engizý, sondaı-aq Qazaqstan Respýblıkasynyń azamattyǵyn alǵannan keıin jeńildikter men ótemaqylar alýǵa ótinish berý quqyqtaryna qatysty túzetýlerine Qazaqstan Úkimetinen oń qorytyndy alyndy.

Bul zań jobasy 2011 jylǵy 20 sáýirde birinshi oqylymda maquldanǵan bolatyn. Zań jobasyn ekinshi oqylymǵa daıyndaý barysynda depýtattar kóptegen tolyqtyrýlar engizdi. Qorytyndy Salystyrma kestege 235 túzetý engizilgen.

Búgin Parlament Májilisiniń jalpy otyrysynda atalǵan zań jobasy ekinshi oqylymda talqyǵa shyǵarylady. Zań jobasy boıynsha jumys tobynyń jetekshisi depýtat Jarasbaı Súleımenovtyń baıandama jasaıtyny kózdelgen.