Májilis depýtattarynyń óńirlerge sapary bastaldy

ASTANA. QazAqparat - Búgin Parlament Májilisiniń tóraǵasy Nurlan Nyǵmatýlın depýtattardyń óńirlerge sapary jáne olardyń qandaı mindetter oryndaıtyny jóninde málim etti, dep habarlaıdy QazAqparat tilshisi.

«Erteńnen bastap bizdiń depýtattyq korpýs saılaýshylarmen kezdesý úshin aımaqtarǵa shyǵatyn bolady. Eń negizgi maqsatymyz - Elbasynyń bıylǵy Joldaýyn jáne onyń barlyq basym baǵyttaryn árbir azamatqa, árbir otbasyǵa jetkizý. Sonymen birge, alda turǵan úlken mindetterdi zań jaǵynan qamtamasyz etý jumystaryn da jan-jaqty túsindirý kerek», - dep toqtaldy N. Nyǵmatýlın Májilistiń jalpy otyrysynda.

Osy oraıda palata tóraǵasy depýtattar el óńirlerin 18-27 qazan aralyǵynda aralaıtynyn naqtylady.

«Depýttardyń halyqpen dástúrli kezdesýleri oblys ortalyqtarynda ǵana emes, sonymen qatar aýdan ortalyqtarynda, eldi mekenderde, aýyldarda ótetin bolady. Árbir saılaýshyǵa deıin jetý óte mańyzdy. Sondyqtan osy kezeńdi  tıimdi ári belsendi paıdalaný kerek. Óıtkeni Joldaý júktegen negizgi mindetter halyqqa egjeı-tegjeıli jetýi tıis», - dep túıdi Nurlan Nyǵmatýlın.

Budan buryn habarlanǵandaı, búgin Parlament Májilisiniń jalpy otyrysynda «2018-2020 jyldarǵa arnalǵan respýblıkalyq bıýdjet týraly» QR Zańyna ózgerister men tolyqtyrýlar engizý týraly» zań jobasy maquldandy.

Munymen qosa, jalpy otyrys barysynda Ulttyq bank tóraǵasy Danııar Aqyshev bıylǵy jyly ınflıatsııa 5-7 paıyzdyq maqsatty dálizde qalatynyn atap ótti.

Sonymen qatar, jyl basynan beri valıýta naryǵynda teńge baǵamy 10,4 paıyzǵa álsiregeni belgili boldy.