Májilis depýtattarynyń kezekten tys saılaýyna qatysýǵa ázirge 4 partııa nıet tanytyp otyr
ASTANA. 5 jeltoqsan. QazAqparat /Aıdar Ospanalıev/ - 2012 jyldyń 15 qańtaryna taǵaıyndalǵan Parlament Májilisiniń kezekten tys saılaýyna partııalar atynan úmitkerlerdi usyný merzimi búgin aıaqtalady. Ortalyq saılaý komıssııasy taratqan málimetterge qaraǵanda, osy ýaqytta OSK-ǵa barlyǵy 4 partııa óziniń úmitkerlerin usynǵan.
Esterińizge sala keteıik, eldegi mańyzdy saıası naýqanǵa eń alǵashqylardyń biri bolyp, «Nur Otan» halyqtyq demokratııalyq partııasy óziniń úmitkerlerin usyndy. Bılik partııasynyń izin alyp, Qazaqstannyń Kommýnıstik halyqtyq partııasy belsendilik tanytty.
Al búgin, úmitkerler usynys bildiretin sońǵy kúni OSK-ǵa «Aýyl» partııasy men «Patrıottar partııasy» saıası naýqannan tys qalmaıtyndyqtaryn bildirdi.
Al saılaýǵa qatysatyn múmkindikteri bola turǵandyqtaryna qaramastan «Rýhanııat», «Aq jol», Jalpyulttyq sotsıal-demokratııalyq partııasy men «Ádilet» partııalary ázirge úmitkerlerin usynǵan joq. Esterińizge sala keteıik, Ádilet mınıstrliginde elimizden barlyǵy 10 partııa resmı tirkelgen. Alaıda Qazaqstannyń Kommýnıstik partııasynyń qyzmeti sot sheshimine baılanysty ýaqytsha toqtatylýyna baılanysty atalmysh partııanyń ókilderi bul jolǵy saıası naýqannan tys qalǵaly otyr. Al «Azat» bul jolǵy saılaýda Jalpyulttyq sotsıal-demokratııalyq partııasymen kúsh biriktirip otyrǵany belgili.
