Májilis depýtattarynyń atyna jeti myńǵa jýyq aryz-shaǵym kelip túsken
ASTANA. 9 shilde. QazAqparat - Besinshi saılanǵan Qazaqstan Respýblıkasy Parlamenti Májilisi depýtattarynyń atyna ekinshi sessııa barysynda jeke jáne zańdy tulǵalar tarapynan jeti myńǵa jýyq ótinish pen aryz-shaǵymdar kelip túsken. Bul málimet Parlamenti Májilisi Apparatynyń jasaǵan qorytyndysynda kórinis taýyp otyr.
6777 hattyń mazmunyna nazar aýdarsaq, onyń basym bóligi, ıaǵnı, 3681 azamattyń aryz-shaǵymy áleýmettik máselelerdi qamtıdy. Sondaı-aq sot ádildigi jáne quqyqtyq tártip máseleleri - 1265 hatta, ekonomıkalyq reforma týraly oı-pikirler 1038 hatta kórinis tapqan. Al zań jobalary boıynsha óz usynystaryn bergen 213 hat kelip túsken eken.
Sonymen birge azamattar óz hattarynda densaýlyq saqtaý máseleleri (363), ǵylym jáne bilim berý máseleleri (192), ekologııa jáne tabıǵı resýrstardy utymdy paıdalaný máseleleri (25) boıynsha depýtattardyń nazar aýdarýyn ótingen.
Elimizdiń óńirlerine bólip qarasaq, ótinish bildirýde Almaty men Astana qalalary kósh bastap tur. Parlamentke almatylyqtar 1324 hat joldasa, astanalyqtar 1133 ótinish bergen. Sonymen qatar Ońtústik Qazaqstan (819), Shyǵys Qazaqstan (640), Qaraǵandy (479), Almaty (427) jáne Aqtóbe (338) oblystarynyń turǵyndary kóptegen máseleni kóterip, hat joldaǵan.
Aıta ketý kerek, hat-habarlar tek elimizdiń turǵyndarynan ǵana emes, TMD elderiniń azamattarynan da kelip túsken. Saraptama jasalyp, iriktelgen jeti taqyryp boıynsha kórshi elderden barlyǵy 228 ótinish qabyldanǵan. Munyń ishinde de áleýmettik máselelerge (133) basymdyq berilgen.
