Májilis depýtattaryn merziminen buryn saılaýǵa qoǵamdy daıyn deýge bolady - M. Bashımov
«Jurtshylyq kópten kútken jańalyqtyń biri - Májilistiń merziminen buryn saılaýy. Keshe Elbasy óziniń ustanymyn naqtylap, Jarlyqqa qol qoıdy. Konstıtýtsııaǵa sáıkes, Prezıdent bundaı usynysty qos palatanyń tóraǵalarymen birge talqylaıdy, Konstıtýtsııalyq Keńespen, Úkimet basshysymen keńesedi. Osynyń barlyq rásimi ótti, keshe saılaý belgilendi. Endi soǵan sáıkes, saılaý 20 naýryzda ótedi. Buǵan jurtshylyq ázir dep oılaımyn», - dedi M. Bashımov.
Onyń aıtýynsha, qazaqstandyq qoǵamnyń saılaýǵa belsendiligi tómen bolmaıdy dep boljanýda. Sonymen qatar, saılaýshylar daýysy úshin partııalardyń kúresi de jan-jaqty bolýy múmkin. «Qazir saıasat sahnasynan endi kórinip júrgen jańa partııalar da saılaýǵa qatysty pikirlerin, usynystaryn bildirýde. Bul demokratııanyń belgisi. Kez kelgen partııa bılik úshin kúresýge múmkindigi bar. Olar osyndaı kezeńdi paıdalanyp halyqqa unamdy, kóńilge qonymdy usynys jasaýlary tıis. Jurtshylyq solardyń arasynan óz tańdaýyn jasaıdy. Buny erteńgi saılaý kórsetedi», - dedi M. Bashımov.
Sarapshynyń sózine qaraǵanda, halyqtyń belsendiligi jaqsy. Tutastaı alǵanda jańa saılaý merziminiń belgilenýi qaı qyrynan alǵanda da ońtaıly.
«Men Prezıdenttiń dál osy qazaqtyń Jańa jyly - Naýryzdyń qarsańyna saılaý taǵaıyndaǵanyn quptadym. Jańa jylǵa jańa kúshpen kiriseıik degen senimdi uıalatady. Bul - jaqsy yrym», - dedi M. Bashımov.
