Májilis depýtattarymen kezdesýde batysqazaqstandyq kásipkerler túıtkildi jaıttardy da jetkizdi
ORAL. QazAqparat - BQO-ǵa jumys saparymen kelgen Májilis depýtattary Azat Perýashev pen Keńes Ábsátirov óńirlik kásipkerler palatasynda batysqazaqstandyq kásipkerlermen kezdesip, Elbasynyń Úndeý men «Qazaqstannyń úshinshi jańǵyrýy: jahandyq básekege qabilettilik» atty Joldaýyna baılanysty alda turǵan mindetterdi atap kórsetti, dep habarlaıdy «QazAqparat» HAA tilshisi.
Joldaýda ekinshi basym baǵyt - bıznes-ortany túbegeıli jaqsartyp, kásipkerlikti qoldaý tetikterin odan ári jetildirýge arnalǵany belgili. Eldiń ishki jalpy ónimindegi shaǵyn jáne orta bıznestiń úlesi 2050 jylǵa qaraı keminde 50 paıyz bolýy kerek. Bul úshin, árıne, úlken jumystar atqarylýy tıis. Azat Perýashevtiń aıtýynsha, osy oraıda «Aqjol» partııasynyń músheleri Elbasy tapsyrmalaryn júzege asyrýǵa daıyn. Joldaýda aıtylǵanyndaı, «Úkimet «Atameken» ulttyq kásipkerler palatasymen (UKP) birlesip, bıznestiń barlyq shyǵynyn jappaı azaıtý jóninde sharalar qabyldaýy qajet. Bul, ásirese, energetıka, kólik jáne logıstıka, sondaı-aq turǵyn úı-kommýnaldyq sharýashylyǵy salalaryndaǵy qyzmet kórsetý qunyna qatysty». Bul mindetti oryndaý úshin túrli kedergilerdi joıý qajet. Aıtalyq, monopolıst kásiporyndar elektr qýatynyń, gaz ben sýdyń tutyný qunyn jónsiz ósirip, kásipkerlerdiń jumys jasaýyna kedergi keltiredi. Oǵan qosa ekinshi deńgeıdegi bankter kásipkerlerdi qoldaýǵa ynta tanyta bermeıdi. Memlekettik satyp alý isinde de sheshilýi tıisti máseleler az emes.
Kezdesýde túıtkildi jaıttar jóninde batysqazaqstandyq kásipkerler de sóz qozǵady. Mysaly, «Otdelstroı» qurylys-kommertsııalyq fırmasy» JShS dırektory Valentına Mıhnonyń pikirinshe, ekinshi deńgeıdegi bankter nesıeni jeke kásipkerlerge 7-14 paıyzdyq mólsherlememen beredi, bul tıimsiz, sondyqtan Úkimet qurylys kompanııalaryn qarjylandyrýdy «Qazaqstan turǵyn úı qurylys jınaq banki» AQ-ǵa júktese, durys bolar edi. Onyń ústine qurylys nysandaryn kommýnaldyq qyzmet júıesine qosý óte qymbat. Saıyp kelgende, qurylys nysandaryn, sonyń ishinde halyq qonystanatyn turǵyn úılerdi salatyn kompanııalardyń zııanǵa qalmaýynyń jolyn izdestirgen jón. Sondaı-aq «Steklo-Servıs» JShS dırektory Arkadıı Rýbtsov jáne basqa kásipkerler memlekettik satyp alý isinde kedergiler men zańbuzýshylyqtar kezdesetinin jasyrmady.
Konstıtýtsııalyq ózgeristerdi de qoldaıtyndyǵyn aıtqan A.Perýashev kásipkerlerdiń qundy usynys-tilekteri aldaǵy ýaqytta zańshyǵarýshylyq qyzmet barysynda eskeriletinin jetkizdi.
