Májilis depýtattary jolaýshy tasymalyna baqylaýdy kúsheıtýdi usyndy
ASTANA. QazAqparat - Parlament Májilisiniń otyrysynda «Nur Otan» partııasy fraktsııasynyń músheleri kóliktik kompanııalardyń jaýapkershiligi máselesin kóterdi, dep habarlaıdy «QazAqparat» HAA tilshisi.
Birneshe áriptesiniń atynan QR Premer-Mınıstri Baqytjan Saǵyntaevqa depýtatyq saýal joldaǵan Májilis depýtaty Erjan Qudaıbergen Aqtóbe oblysyndaǵy qaıǵyly jaǵdaıdy mysalǵa keltirdi.
«Bizdiń saýalymyz elimizdegi jolaýshylar tasymaldaıtyn avtobýstaryna qatysty jol-kólik apattary jıi qaıtalanýyna baılanysty bolyp otyr. 2018 jyldyń 18 qańtarynda Aqtóbe oblysynda «Samara-Shymkent» tasjolynda jantúrshigerlik jol apaty boldy. Saldarynan 52 adam avtobýstyń ishinde qaza tapty. 3 oblystyń qadaǵalaý beketterinen ótkeni (órtengen avtobýs - avt.) - nazar aýdaratyndaı másele», - deıdi depýtar.
Ol sonymen qatar, taǵy da bir keleńsiz jaǵdaıǵa toqtaldy.
«Reseıdiń Vladımır oblysynda «Sankt-Peterbýrg-Nıjnıı Novgorod» baǵytynda temirjol poıyzy ótkelinde qazaqstandyq jolaýshylar avtobýsy poıyzben soqtyǵysyp, apat saldarynan 18 adam qaza taýyp, 10 adam jaraqat aldy (2017 jyldyń qazan aıynda bolǵan - avt.) Sonymen qosa, Aqmola oblysynda avtobýs júrgizýshisi avtoturaqta júregi toqtap qaza tapty. Eger jolaýshylardy tasymaldaý kezinde bul jaǵdaı bolǵanda, bul úlken apatqa uryndyrýy múmkin edi. Ókinishke qaraı, osyndaı jaǵymsyz jaǵdaılardyń jyl saıyn myńdaǵan azamattar zardap shegýde. Joǵaryda keltirilgen apattardyń negizgi sebepteri qylmystyq nemquraıdylyq nen jaýapsyzdyq bolyp otyr», - deıdi ol.
Májilismen jolaýshylardy tasymaldaýshylar eski avtobýstaryn jańalaý bylaı tursyn, ony jóndeý shyǵynynda azaıtyp, eski-qusqy jaramsyz halde jolaýshylardyń ómirin qaýipke tigetinin másele etip kóterdi.
«Avtobýstaryn osylaı júrgizetinder jetkilikti. Osyndaı avtobýstar jolda apatqa ushyraǵanda júrgizýshini aıypqa tartyp jatady. Ol transporttyq kompanııalar jaýapkershilikten basyn alyp qashady. Osyndaı jaǵdaılardy eskere otyryp, transporttyq kompanııalardyń jaýapkershiligin arttyrý qajet dep sanaımyz», - deıdi Erjan Qudaıbergen.
Depýtaty aldaǵy ýaqytta jolaýshylardyń qaýipsizdigin qamtamasyz etý maqsatynda naqty sharalardy qolǵa alýǵa shaqyrdy.
«Jolaýshylar tasymaldaýshylarǵa respýblıkalyq, oblystyq deńgeıde jan-jaqty is-sharalar uıymdastyryp, avtokólik quraldaryn tehnıkalyq jaǵdaıyna qatań talap qoıý, avtobýstardyń qoldaný merzimin shekteý jasaý, zamanaýı baqylaý quraldardy paıdalanýdy mindetteý, avtobýs júrgizýshilerdiń densaýlyǵyn tekserý sharalaryn júrgizip, baqylaýdy kúsheıtý qajet dep esepteımin», - dep túıdi depýtat.
